តារាសម្តែងវ័យក្មេង ម៉ូនី វិជ្ជរ៉ា បានកំពុងសម្រុកបញ្ចេញស្នាដៃភាពយន្តថ្មីៗ ដើម្បីបង្កើនប្រជាប្រិយភាពរបស់ខ្លួន ខណៈស្នាដៃភាពយន្តរបស់តារាស្រីរូបនេះ បាននឹងកំពុងត្រៀមចាក់បញ្ចាំង ហើយក៏កំពុងសស្រាក់សស្រាំថតភាពយន្តថ្មីបន្ថែមទៀត។

ត្បិតទើបប្រឡូកសិល្បៈថ្មីថ្មោងក៏ពិតមែន តែតារាសម្តែងវ័យក្មេង ម៉ូនី វិជ្ជរ៉ា ក្តោបបានការគាំទ្រខ្លាំងពីទស្សនិកជនតាមរយៈភាពយន្តដែលបញ្ចេញជាបន្តបន្ទាប់ ជាក់ស្តែងបច្ចុប្បន្នតារាសម្តែងរូបនេះ កំពុងសម្រុកបញ្ចេញស្នាដៃបង្កើនប្រជាប្រិយភាពឲ្យកាន់តែខ្លាំងក្លាជាងពេលនេះ។

តួយ៉ាង ភាពយន្តដែលតារាស្រីរូបនេះគ្រោងបញ្ចេញភាគច្រើនជារឿងភាគ ដោយឡែកស្នាដៃរឿងដុំរបស់នាង គឺបាននឹងកំពុងចាក់បញ្ចាំងតាមបណ្តារោងភាពយន្តនានា គឺរឿង «កុមារី២៥ឆ្នាំ» វគ្គ៣ ដោយក្នុងរឿងនេះនាងសម្តែងជាតួអង្គគ្រូពេទ្យ។

ផ្តល់កិច្ចសម្ភាសន៍ជាមួយអ្នកសារពត៌មានជីវិតកម្សាន្តកាលពីពេលថ្មីៗ វិជ្ជរ៉ា និយាយថា សព្វថ្ងៃនាងកំពុងរវល់ច្រើនលើការថតភាពយន្តភាគថ្មីរបស់ភីអិនអិន ដែលរឿងថ្មីនេះ នាងទទួលបានឱកាសសម្តែងជាតួឯកស្រីម្តងទៀត។ ភាពយន្តភាគថ្មីនេះ ចំណងជើង «មន្តស្នេហ៍ចៅស្រី»។

ស្រីស្រស់រាងតូចច្រឡឹងនេះថា រឿងថ្មីនេះនាងសម្តែងជាក្មេងស្រីម្នាក់មានចរិកក្រមិចក្រមើម ក្បាលខូច តែម៉ឺងម៉ាត់។ អ្វីដែលសំខាន់តួឯកប្រុសក្នុងរឿងនេះជាកម្លោះសង្ហា រាងខ្ពស់ស្រឡះ ហើយថ្ពាល់ខួចសងខាង។

និយាយបន្ដដោយញញឹមញញែម តែពេញដោយភាពជឿជាក់ តួឯកស្រីរឿង «តួគេ ខ្ញុំសម្តែង» ជឿជាក់យ៉ាងមុតមាំថា រឿងនេះនឹងមានអ្នកទស្សនាច្រើន ព្រោះរឿងនេះរឿងបែបកំប្លុកកំប្លែង។

ក្រៅពីរឿង «មន្តស្នេហ៍ចៅស្រី» ម៉ូនី វិជ្ជរ៉ា ក៏នឹងលេចមុខក្នុងរឿង «រសជាតិអ្នកមាន» ដែលនិពន្ធ និងដឹកនាំរឿងរបស់អ្នកស្រី ពាន់ ភួងបុផ្ផា ផងដែរ។ ដោយតាមគម្រោង «រសជាតិអ្នកមាន» នឹងចាក់បញ្ចាំងលើកញ្ចក់ទូរទស្សន៍ទំនើបភីអិនអិនឆាប់ៗនេះ។

ដើម្បីបង្កបរិយាកាសសម្រាប់អ្នកគាំទ្រភាពយន្តភាគខ្មែររបស់ភីអិនអិនឲ្យកាន់តែសប្បាយរីករាយ ភីអិនអិនបានបង្កើតល្បែងកម្សាន្តសប្បាយៗសម្រាប់ឲ្យទស្សនិកជនអាចចូលរួមទស្សន៍ទាយតួឯកប្រុសក្នុងរឿង «មន្តស្នេហ៍ចៅស្រី» ទាំងអស់គ្នា។

ងាយៗដើម្បីបានចូលរួមទស្សន៍ទាយជ្រើសរើសតួឯកប្រុសដែលនឹងលេចមុខក្នុងភាពយន្តភាគថ្មីរបស់ភីអិនអិន លោកអ្នកគ្រាន់តែចូលទៅកាន់ទំព័រហ្វេសប៊ុក PNN Drama Fan Club រួចស្វែងរកផ្ទាំងរូបភាពនេះ ហើយ Comment មតិយោបល់របស់អ្នកនៅពីក្រោមរូបនេះជាការស្រេច។

អត្ថបទ៖ រ៉ាត់ ចាន់ធីតា  រូបភាព៖ ឃាង ទូច