តារាល្បីៗជាច្រើនដូចជា Lana Del Rey និងសមាជិកក្រុមខេប៉ុប IVE និង TXT បានទាក់ទាញអ្នកគាំទ្រច្រើនកុះករពេលចូលរួមកម្មវិធី Paris Fashion Week កាលពីថ្ងៃអាទិត្យ។

កម្មវិធីបង្ហាញម៉ូដ Collection រដូវផ្ការីកនិងរដូវក្ដៅឆ្នាំ ២០២៦ របស់ម៉ាកសម្លៀកបំពាក់ល្បីពីប្រទេសអ៊ីតាលី Valentino នៅក្នុងកំលុងព្រឹត្តិការណ៍សប្ដាហ៍ម៉ូដ Paris Fashion Week កាលពីថ្ងៃទី ៥ ខែតុលា បានប្រមូលផ្ដុំដោយវត្តមានតារាល្បីៗអន្តរជាតិជាច្រើនទាំងពីវិស័យតន្ត្រី និងវិស័យភាពយន្ត។ 

អ្នកគាំទ្រយ៉ាងច្រើនកុះករបានរង់ចាំជាច្រើនម៉ោងនៅបរិវេណខាងក្រៅនៃទីកន្លែងបង្ហាញម៉ូដ គឺវិទ្យាស្ថានវប្បធម៌ Arab World ដើម្បីបានឃើញការាមកដល់របស់តារាល្បីៗក្នុងដួងចិត្តដែលចូលរួមក្នុងព្រឹត្តិការណ៍បង្ហាញម៉ូដដ៏ធំមួយនេះ។ 

វត្តមានបុគ្គលល្បីៗជាច្រើនដែលបានចូលរួមនៅថ្ងៃនោះរួមមានតារាចម្រៀងកំពូលមនោសញ្ចេតនា Lana Del Rey, តារាចម្រៀងខេប៉ុបដូចជា Soobin ពីក្រុម Tomorrow X Together និង Rei និង Liz ពីក្រុម IVE ព្រមទាំងតារាសម្ដែងអន្តរជាតិជាច្រើនទៀតដូចជា Colman Domingo, Meghann Fahy, Joseph Quinn, Jeff Satur និង Freen Sarocha ។ 

តារាល្បីភាគច្រើនបានឆ្លៀតពេលខ្លីៗ ដើម្បីថតរូប និងស្វាគមន៍អ្នកគាំទ្រ មុនពេលចូលទៅកាន់ទីកន្លែង ដើម្បីទស្សនាការបង្ហាញម៉ូដសម្លៀកបំពាក់រដូវផ្ការីកនិងរដូវក្ដៅឆ្នាំ២០២៦ ដែលរៀបចំឡើងដោយនាយកប្រឌិតរបស់ Valintion គឺលោក Alessandro Michele។ គួររំឭកថា លោក Alessandro Michele គឺជាអតីតអ្នកច្នៃម៉ូដរបស់ម៉ាក Gucci និងបានផ្លាស់មកទទួលតំណែងនាយកច្នៃប្រឌិតរបស់ Valentino កាលពីខែមីនា ឆ្នាំ២០២៤។

កម្មវិធី Paris Fashion Week នឹងដំណើរការរហូតដល់ថ្ងៃទី ៧ ខែតុលា ដោយនៅមានការបង្ហាញម៉ូដធំៗមួយចំនួនទៀតដូចជាកម្មវិធីរបស់ម៉ាក Chanel កម្មវិធីរបស់ម៉ាក Balenciaga និងកម្មវិធីរបស់ម៉ាក Loewe ជាដើម  ៕

ប្រែសម្រួល៖ វ៉ាន់ថន