ក្មេងទំនើងតាមដងផ្លូវមួយក្រុមត្រូវបានចាប់ខ្លួនបន្ទាប់ពីចូលលួចនៅផ្ទះមួយរបស់តារាសម្ដែងអាមេរិក Brad Pitt ដែលមានទីតាំងក្នុងទីក្រុង Los Angeles ។

សេចក្ដីរាយការណ៍កាលពីពេលថ្មីៗដែលដកស្រង់សម្តីលោក Jim McDonnell មេប៉ូលីសក្រុង Los Angeles បានឱ្យដឹងថាជនសង្ស័យ ៤ នាក់មានអាយុពី ១៦ ដល់ ១៨ ឆ្នាំត្រូវបានចាប់ខ្លួនក្រោមការចោទប្រកាន់ថាបានលួចគាស់ផ្ទះ Brad Pitt និងតារាល្បីៗជាច្រើនមកហើយក្នុងតំបន់នេះ។ 

ប៉ូលីសមិនបានបញ្ជាក់នោះទេថាតើ ជនសង្ស័យមួយក្រុមនេះបានចូលផ្ទះតារាណាខ្លះ ប៉ុន្តែតំបន់នោះត្រូវបានគេដឹងថាជាទីលំនៅរបស់តារាល្បីជាច្រើនទៀតដូចជាតារាសម្ដែង Nicole Kidman, Keith Urban និងអតីតខ្សែប្រយុទ្ធ Olivier Giroud របស់ក្លឹបបាល់ទាត់ LA ជាដើម។

ការស៊ើបអង្កេតបានចាប់ផ្តើមនៅក្នុងខែមិថុនា បន្ទាប់ពីផ្ទះមួយចំនួននៅសង្កាត់ Los Feliz ត្រូវបានប៉ូលីសសម្រុកចូលឆែកឆេរ ដោយលោក McDonnell បាននិយាយថា បង្អួចផ្ទះមួយចំនួនត្រូវបានរុះរើ ហើយរបស់របរត្រូវបានគេលួចយក នៅពេលប៉ូលីសទៅដល់។

ទោះយ៉ាងណា ខាងប៉ូលិសមិនបានបញ្ជាក់នោះទេថា តើទ្រព្យសម្បត្តិត្រូវបានលួចនោះគឺជារបស់តារាសម្ដែង Brad Pitt ឬរបស់អ្នកណា។បន្ទាប់ពីមានសេចក្ដីរាយការណ៍ សារព័ត៌មានរ៉យទ័របានទាក់ទងតំណាងរបស់តារាសម្ដែង Brad Pitt ដើម្បីសុំការអត្ថាធិប្បាយ ប៉ុន្តែមិនទទួលបានការឆ្លើយតបភ្លាមៗនោះទេ ៕
 

ប្រែសម្រួល៖ វ៉ាន់ថន