ថ្លែងក្នុងសារវីដេអូជាប្រចាំកាលពីយប់ថ្ងៃអាទិត្យ ប្រធានាធិបតីអ៊ុយក្រែនលោក វ៉ូឡូឌីមៀ ហ្សឺឡិនស្គី បាននិយាយថា គ្មានជំហានពិតប្រាកដណាមួយពីប្រទេសរុស្ស៊ីឆ្ពោះទៅរកសន្តិភាពនោះទេ ហើយក៏គ្មានសកម្មភាពទាំងលើគោក និងផ្លូវអាកាសណាមួយអាចជួយសង្គ្រោះជីវិតពលរដ្ឋអ៊ុយក្រែនបានដែរ គឺមានតែសន្តិភាពតែប៉ុណ្ណោះ។

យ៉ាងណាមិញលោក ហ្សឺឡិនស្គី បាននិយាយថា មនុស្សយ៉ាងតិច១២នាក់បានរងរបួសក្នុងការវាយប្រហាររបស់រុស្ស៊ីលើតំបន់ហ្សាប៉ូរីហ្ស៊ារបស់អ៊ុយក្រែនកាលពីថ្ងៃអាទិត្យ។ ដូច្នេះហើយនៅក្នុងសារវីដេអូនេះលោក ហ្សឺឡិនស្គី បាននិយាយថា ដើម្បីឱ្យមានសន្តិភាពគឺមានតែការដាក់ទណ្ឌកម្ម និងសម្ពាធលើរុស្ស៊ីប៉ុណ្ណោះទេទើបអាចជំរុញឱ្យរុស្ស៊ីបញ្ចប់សង្គ្រាមនេះបាន ហើយលោកក៏បានអំពាវនាវឱ្យមានការគាំទ្រពីសហរដ្ឋអាម៉េរិក សហភាពអឺរ៉ុប និងប្រជាជាតិទាំងអស់ដែលត្រូវការសន្តិភាព និងស្ថិរភាពនៅក្នុងទំនាក់ទំនងអន្តរជាតិផងដែរ។

ការអំពាវនាវរបស់លោក ហ្សឺឡិនស្គី នេះបានធ្វើឡើងចំពេលប្រធានាធិបតីអាម៉េរិកលោក ដូណាល់ ត្រាំ និងសមភាគីរុស្ស៊ីលោក វ្ល៉ាឌីមៀ ពូទីន គ្រោងនឹងជួបគ្នាផ្ទាល់នៅឯរដ្ឋអាឡាស្កាសហរដ្ឋអាម៉េរិកនៅថ្ងៃសុក្រ ទី១៥ ខែសីហាដើម្បីពិភាក្សាអំពីការបញ្ចប់សង្គ្រាមនៅអ៊ុយក្រែន។

លោក ត្រាំ បានធ្វើការប្រកាសយ៉ាងខ្លាំងនៅលើប្រព័ន្ធផ្សព្វផ្សាយសង្គមកាលពីថ្ងៃសុក្រថា ភាគីនានារួមទាំងលោក ហ្សឺឡិនស្គី ផងជិតឈានដល់កិច្ចព្រមព្រៀងឈប់បាញ់គ្នាហើយដែលអាចនឹងដោះស្រាយជម្លោះរយៈពេល៣ឆ្នាំកន្លះមកនេះដែលអាចតម្រូវឱ្យអ៊ុយក្រែនលះបង់ទឹកដីសំខាន់ៗមួយចំនួន៕

ប្រែសម្រួល៖ ប៉ិច ស៊ីនួន