ក្រុមចម្រៀងបុរសជួរមុខរបស់ខេប៉ុប Seventeen នឹងចេញអាល់ប៊ុមខ្នាតពេញថ្មីមានចំណងជើងថា "Happy Burstday" ដើម្បីអបអរសាទរខួបគម្រប់ ១០ ឆ្នាំនៃការបង្ហាញខ្លួនជាលើកដំបូងរបស់ពួកគេ។

ផលិតកម្ម Pledis Entertainment ដែលជាទីភ្នាក់ងាររបស់ Seventeen បាន​​​​ឱ្យដឹងនៅថ្ងៃអង្គារ ទី២២ ខែមេសានេះថា ក្រុមចម្រៀងមួយនេះនឹងបញ្ចេញអាល់ប៊ុមថ្មីដែលជាអាល់ប៊ុមខ្នាតពេញទីប្រាំរបស់ខ្លួនមានចំណងជើងថា "Happy Burstday" ដើម្បីអបអរសាទរខួបគម្រប់ ១០ ឆ្នាំនៃការបង្ហាញខ្លួនជាលើកដំបូងរបស់ពួកគេ។

អាល់ប៊ុមនេះដែរនឹងក្លាយជាអាល់ប៊ុមខ្នាតពេញដំបូងរបស់ពួកគេក្រោយរយៈពេលប្រហែល ៣ ឆ្នាំ បន្ទាប់ពីអាល់ប៊ុម "Face the Sun" ដែលបានចេញតាំងពីឆ្នាំ ២០២២។

សម្រាប់ចំណងជើងអាល់ប៊ុម "Happy Burstday" ត្រូវបានផលិតកម្មបកស្រាយថាគឺជាការរួមបញ្ចូលគ្នានូវពាក្យ "ថ្ងៃកំណើត" និងពាក្យ "ផ្ទុះ" ដែលជានិមិត្តរូបនៃការប្តេជ្ញាចិត្តរបស់សមាជិកក្រុមដើម្បីបង្កើតក្រុម Seventeen ជាមួយរូបភាពថ្មី។ អាល់ប៊ុម​នេះ​ត្រូវ​បាន​កំណត់​ចេញផ្សាយ​នៅ​ថ្ងៃ​ទី ២៦ ខែ​ឧសភា ជា​កាលបរិច្ឆេទ​ដូច​គ្នា​ដែល​ក្រុម​នេះ​បាន​ចេញមុខ​ជា​លើក​ដំបូង​កាល​ពី​មួយ​ទសវត្សរ៍​មុន។

 
ទីភ្នាក់ងារដដែលបានរៀបរាប់ថា Seventeen នឹងផ្សារភ្ជាប់ទំនាក់ទំនងជាមួយ Carats ដែលជាអ្នកគាំទ្ររបស់ពួកគេទូទាំងពិភពលោកតាមរយៈមាតិកាផ្សេងៗគ្នា រួមទាំងអាល់ប៊ុមខ្នាតពេញទីប្រាំ និងការសម្តែងពិសេសៗជាច្រើនដើម្បីអបអរសាទរខួប ១០ ឆ្នាំពួកគេ ។

យ៉ាងណាមិញមុនចេញអាល់ប៊ុមថ្មី ក្រុមចម្រៀងប្រុសដែលមានសមាជិក ១៣ នាក់មួយនេះក៏នឹងមានការរៀបចំព្រឹត្តិការណ៍ជួបសំណេះសំណាលសម្រាប់អ្នកគាំទ្រជប៉ុន នៅទីក្រុង Osaka ចាប់ពីថ្ងៃទី ២៤ ដល់ថ្ងៃទី ២៧ ខែមេសា និងនៅទីក្រុង Saitama ចាប់ពីថ្ងៃទី ១០ ដល់ថ្ងៃទី ១១ ខែឧសភា ៕

ប្រែសម្រួល៖ វ៉ាន់ថន