រដ្ឋបាលលោកប្រធានាធិបតីអាមេរិក Donald Trump បានបញ្ឈប់បុគ្គលិកនៅតាមបណ្តាស្ថាប័នសុខាភិបាលជាច្រើនរបស់សហរដ្ឋអាមេរិក រួមមានមជ្ឈមណ្ឌលគ្រប់គ្រង និងបង្ការជំងឺឬ(CDC), រដ្ឋបាលឱសថនិងស្បៀងអាហារ(FDA) និងវិទ្យាស្ថានជាតិសុខភាព(NIH) ខណៈរដ្ឋបាលអាមេរិក ចាប់ផ្តើមផែនការរបស់ខ្លួនកាត់បន្ថយបុគ្គលិកក្នុងវិស័យសុខាភិបាលចំនួន១០,០០០នាក់។ យោងសារព័ត៌មានរ៉យទ័រ។ 

ការកាត់បន្ថយបុគ្គលិកក្នុងវិស័យសុខាភិបាល ជាចំណែកនៃផែនការដ៏ធំរបស់លោកប្រធានាធិបតីDonald Trump និងមហាសេដ្ឋីElon Musk ក្នុងការកាត់បន្ថយបុគ្គលិកក្នុងស្ថាប័នរដ្ឋរបស់សហរដ្ឋអាមេរិក។ 

បុគ្គលិកម្នាក់នៅស្ថាប័នFDAបាននិយាយថា បុគ្គលិកត្រូវបង្ហាញកាតសំគាល់ខ្លូនរបស់ពួកគេ នៅច្រកចូលអាគារ ហើយអ្នកដែលត្រូវបញ្ឈប់ពីការងារ ទទួលបានសំបុត្រមួយ និងប្រាប់ថា ឱ្យវិលត្រលប់ទៅផ្ទះវិញ។ យោងសារព័ត៌មានរ៉យទ័រ។ 

យោងតាមសារអ៊ឺម៉ែលដែលសារព័ត៌មានរ៉យទ័របានឃើញ, បុគ្គលិកផ្សេងទៀតដែលត្រូវបញ្ឈប់ការងារ ទទួលបានសារអ៊ឺម៉ែល នៅព្រឹកថ្ងៃអង្គារ ប្រាប់ថា ការបញ្ឈប់ពួកគេ មិនឆ្លុះបញ្ចាំងពីសេវាកម្មរបស់ពួកគេ, ការបំពេញការងារ ឬការប្រព្រឹត្តឡើយ ហើយថា ពួកគេនឹងត្រូវបានដាក់ឱ្យឈប់សម្រាករដ្ឋបាលភ្លាមៗ។ 

នៅស្ថាប័នCDC, បុគ្គលិកដែលត្រូវបញ្ឈប់ ធ្វើការនៅ មជ្ឈមណ្ឌលជាតិសម្រាប់សុខភាពបរិស្ថាន, រដ្ឋបាលសេវាសុខភាពផ្លូវចិត្តនិងគ្រឿងញៀន,និងមជ្ឈមណ្ឌលជាតិចាក់ថ្នាំបង្ការរោគ និងជំងឺផ្លូវដង្ហើម។

ប្រែសម្រួល៖ណាវ័ន្ត