ថ្មីៗកន្លងទៅទើបតែបង្ហាញពីស្ថានភាបសុខភាពបានល្អប្រសើរជាងមុនច្រើន ស្រាប់តែនៅថ្ងៃនេះលោកតា ហ៊្វុយហ្សូ ដែលជាតារាកំប្លែង និងជាគ្រូសិល្បៈជើងចាស់ ត្រូវបានក្រុមគ្រួសារបញ្ជូនចូលបន្ទប់សង្រ្គោះបន្ទាប់នៅមន្ទីរពេទ្យ រុស្ស៊ី ផ្នែកសួតកម្រិតធ្ងន់ ។ 

ស្ថានភាពសុខភាពរបស់លោកតា ហ៊្វុយហ្សូ ដែលជាដែលជាតារាកំប្លែង និងជាគ្រូសិល្បៈជើងចាស់បុរាណពេលនេះ កំពុងស្ថិតនៅក្នុងបន្ទប់សង្រ្គោះបន្ទាន់នៅមន្ទីរពេទ្យ រុស្ស៊ី ផ្នែកសួតកម្រិតធ្ងន់ បន្ទាប់ពីលោកតាមានអាការៈក្អក ហត់ខ្លាំង និងមានកំហាកចេញឈាម ។

ជួបជាមួយលោកតា ស៊ូ សាវ៉ាង ហៅលោកតា ហ៊្វុយហ្សូ កាលពីចុងខែកុម្ភះកន្លងមកនេះនៅក្នុងកម្មវិធីសម្ពោធការិយាល័យថ្មី សមាគមសិល្បករខ្មែរ លោកតា ហ៊្វុយហ្សូ បានបង្ហាញពីស្ថានភាពសុខភាពរបស់លោកថា លោកបានធូរស្រាលជាងមុនបន្តិច បន្ទាប់ពីបានទៅពិនិត្យ តាមដាន និងព្យាបាលសុខភាពនៅប្រទេស ថៃ ហើយលោកនឹងត្រឡប់ទៅវិញនៅខែក្រោយតាមការណាត់ ។ 

ទើបតែនិយាយនិងបង្ហាញពីសុខភាពល្អមិនទាន់បានប៉ុន្មានសប្តាហ៍ផងស្រាប់តែនៅថ្ងៃទី ១២ ខែ មីនា ឆ្នាំ២០២៥ នេះ លោកតា ត្រូវបានក្រុមគ្រួសារបញ្ជូនចូលបន្ទប់សង្រ្គោះបន្ទាន់នៅមន្ទីរពេទ្យ រុស្ស៊ី ដើម្បីព្យាបាលនិងតាមដានសុខភាព បន្ទាប់ពីសុខភាពលោកធ្វើទុក្ខខ្លាំង ។ 

លោក វណ្ណៈ ដែលត្រូវជាកូនប្រុសរបស់លោកតា ហ៊្វុយហ្សូ បានប្រាប់ថា លោកតាពេលនេះកំពុងស្ថិតនៅក្នុងបន្ទប់ ICU ផ្នែកសួតកម្រិតធ្ងន់នៅក្នុងមន្ទីរពេទ្យ រុស្ស៊ី ដោយសារប៉ុន្មានថ្ងៃមុនសុខភាពលោកតាមានអាការៈ ក្អក ហត់ខ្លាំង និងមានកំហាកចេញឈាម ទើបត្រូវបញ្ជូនទៅសង្រ្គោះបន្ទាន់នៅមន្ទីរពេទ្យ រុស្ស៊ី ដែលមានជំនាញខាងនេះស្រាប់ ។ 

ស្ថានភាពសុខភាពលោកតា ហ៊្វុយហ្សូ នៅពេលនេះនៅពុំទាន់ធូរស្រាលទេ ប៉ុន្តែលោកតាទទួលបានការពិនិត្យនិងព្យាបាលយ៉ាងយកចិត្តទុកដាក់ពីគ្រូពេទ្យជំនាញនៅក្នុងមន្ទីរពេទ្យ រុស្ស៊ី ។ជាមួយគ្នានេះផងដែរ សមាគមសិល្បករខ្មែរ ក៏បានអំពាវនាវដល់សប្បុរសជនជាពិសេសមហាជន ដែលតែងតែមានការគាំទ្រចំពោះសិល្បកររៀមច្បង អាចចូលរួមបរិច្ចាថវិការតាមលទ្ធភាព ដើម្បីរំលែកការលំបាកលើការចំណាយដ៏ច្រើនរបស់ក្រុមគ្រួសាររបស់សិល្បកររៀមច្បងលោកតា ស៊ូ សាវ៉ាង ហៅលោកតា ហ៊្វុយហ្សួ ។ ទាំងអ្នកគាំទ្រនិងសិល្បករថ្មីចាស់បានផ្ញើសារជូនពរលោកតា ហ៊្វុយហ្សូឆាប់បានធូរស្រាលពីជំងឺ ៕ 

អត្ថបទ ៖ ម៉ា រីសា រូបភាព ៖ ភីអិនអិន និង ផ្តល់ឱ្យ