សមាគមអ្នកនាំចេញ និងផលិតអាហារសមុទ្រវៀតណាម បានឱ្យដឹងថា ប្រទេសវៀតណាម រកចំណូលបានជាង ២៧៣លានដុល្លារអាមេរិកពី ការនាំចេញបង្គា ក្នុងខែដំបូង ឆ្នាំ ២០២៥ កើនឡើង ១៣% ធៀបនឹងពេលដូចគ្នាកាលពីឆ្នាំមុន។ នេះបើតាមការចេញផ្សាយដោយ សារព័ត៌មានក្នុងស្រុកវៀតណាម នៅថ្ងៃនេះ។

សមាគម បញ្ជាក់ថា ឧស្សាហកម្មនាំចេញបង្គារបស់វៀតណាម បានចាប់ផ្ដើមស្ទុះឡើងនៅដើមឆ្នាំ ២០២៥ ជាមួយនឹងកំណើនគួរឲ្យចាប់អារម្មណ៍ ហើយក្លាយជាតួអង្គសំខាន់ នៅក្នុងទីផ្សារនាំចេញអាហារសមុទ្រក្នុងស្រុក។

ទិន្នន័យពីសមាគមអ្នកនាំចេញ និងផលិតអាហារសមុទ្រវៀតណាម បង្ហាញថា ផលិតផលបង្គា បានកត់ត្រាការកើនឡើង ១៣% ក្នុងខែមករា ឆ្នាំ ២០២៥ ដែលឈានដល់ចំនួនសរុប ២៧៣ លានដុល្លារអាមេរិក។

សរុបមក ការនាំចេញអាហារសមុទ្ររបស់វៀតណាមក្នុងខែមករា ឆ្នាំ ២០២៥ មានចំនួន ៧៧៤លានដុល្លារអាមេរិក ដែលឆ្លុះបញ្ចាំងពីការកើនឡើងតិចតួច ៣% បើធៀបនឹងរយៈពេលដូចគ្នាក្នុងឆ្នាំ ២០២៤។

នៅឆ្នាំ ២០២៥ ឧស្សាហកម្មបង្គាវៀតណាម មានគោលបំណងសម្រេចការនាំចេញ ៤ពាន់ ៣រយលានដុល្លារអាមេរិក កើនឡើងប្រហែល ៣០០លានដុល្លារ ធៀបនឹងឆ្នាំមុន។

វៀតណាម ក៏រំពឹងថា នឹងឃើញមានកំណើនខ្លាំង ក្នុងការនាំចេញទៅកាន់ទីផ្សារ ដែលមានសក្តានុពលដូចជា អូស្ត្រាលី មជ្ឈិមបូព៌ា ចក្រភពអង់គ្លេស និងកូរ៉េខាងត្បូង។

ទោះជាយ៉ាងណាក៏ដោយ ប្រទេសចិន ដែលជាទីផ្សារនាំចេញបង្គាដ៏សំខាន់មួយរបស់វៀតណាម ប្រឈមនឹងការធ្លាក់ចុះនៃ ការប្រើប្រាស់ក្នុងស្រុក ហើយការផ្លាស់ប្តូរទម្លាប់នៃ ការចំណាយរបស់វណ្ណៈកណ្តាលរបស់ប្រទេសចិន៕
 

អត្ថបទ៖ ងួន សុភ័ត្រ្តា រូបភាព៖ ឯកសារ