ឆ្លងកាត់ការប្រកួតចម្រាញ់យ៉ាងស្វិតស្វាញជាច្រើនវិញ្ញាសាររួចមក នៅទីបំផុតយើងបានរកឃើញបេក្ខភាពជើងខ្លាំងចំនួន ៥រូប ឆ្លងទៅកាន់វគ្គផ្តាច់ព្រ័ត្រនៅថ្ងៃទី២ ខែកុម្ភៈ ឆ្នាំ២០២៥ ចុងសប្ដាហ៍នេះ។

នៅទីបំផុតយើងក៏បានស្វែងរកឃើញបេក្ខភាពជើងខ្លាំងទាំង ៥រូប ដែលអាចឆ្លងកាត់វគ្គពាក់កណ្តាលផ្តាច់ព្រ័ត្រ ឆ្ពោះទៅវគ្គផ្តាច់ព្រ័ត្រ នៃកម្មវិធីប្រឡងចម្រៀងរ៉េបដ៏ធំប្រចាំឆ្នាំ RAPPER FIGHTER។ 

Rapper ជើងខ្លាំងទាំង ៥រូបដែលអាចឈានទៅការប្រកួតវគ្គផ្តាច់ព្រ័ត្រ នៅថ្ងៃទី២ ខែកុម្ភៈ ឆ្នាំ២០២៥ ខាងមុខ រួមមាន៖ TORO , OG GOLDEN , RANNGO , STEEZY និង EMI។ ក្នុងនោះ OG GOLDEN ជាកូនក្រុមតែម្នាក់គត់របស់ Coach RuthKo ដែលបានជាប់ទៅដល់ការប្រកួតវគ្គផ្តាច់ព្រ័ត្រ។ 

ជាក់ស្តែង ក្នុងថ្ងៃប្រកួតវគ្គពាក់កណ្តាលផ្តាច់ព្រ័ត្រ កាលពីរាត្រីថ្ងៃទី២៦ ខែមករា ឆ្នាំ២០២៥ យប់មិញ ក្រុមការងារកម្មវិធី RAPPER FIGHTER បានធ្វើការស្មឹងស្មាតដើម្បីគោរពវិញ្ញាណក្ខន្ធរបស់ Coach RuthKo ដែលបានចែកឋានទៅហើយនោះ។ គ្រាន់តែពិធីករប្រកាសថា OG GOLDEN អាចបន្តទៅវគ្គផ្តាច់ព្រ័ត្រភ្លាម កូនក្រុមរូបនេះប្រញាប់យកដៃគោះកៅអីដែល Coach RuthKo ធ្លាប់អង្គុយ ជាសញ្ញាបញ្ជាក់ប្រាប់ពីភាពជោគជ័យឆ្ពោះទៅវគ្គផ្តាច់ព្រ័ត្រ ដែលកើតចេញពីការប្រឹងប្រែងដុះខាតរបស់ Coach ដ៏មានសមត្ថភាពរូបនេះ។

បេក្ខជនកំពូលទាំង ៥រូបខាងលើនឹងបន្តប្រកួតប្រជែងគ្នាតាមរយៈស្ថាដៃចម្រៀងរ៉េប ដែលបង្កប់ដោយអត្ថន័យខ្លឹមសារ ពាក្យពេចន៍ចុងជួន ប្រកបដោយស្ទីលរ៉េបបែបសិល្បៈរៀងៗខ្លួន ដើម្បីអាចក្លាយជាម្ចាស់ជយលាភីដំបូងគេបង្អស់នៃកម្មវិធីប្រឡងចម្រៀងរ៉េបដ៏ធំ RAPPER FIGHTER របស់ភីអិនអិន។ 

ម្ចាស់ជយលាភី RAPPER FIGHTER នឹងទទួលបានខ្សែករបណ្តោង RAPPER FIGHTER ដ៏ធំ ជាមួយប្រាក់រង្វាន់ ៦០ ០០០ ០០០ រៀល (៦០លានរៀល) កុងត្រាការងារពីភីអិនអិន រួមជាមួយការងារ Concert ជាច្រើនពីដៃគូររបស់យើងដូចជា ស្រាបៀរ GANZBERG ភេសជ្ជៈ IDOL ភេសជ្ជៈ BOOSTRONG និងទឹកផ្លែឈើ Freshy ផងដែរ។

តើ Rapper ជើងខ្លាំងរូបណាដែលអាចក្លាយជាម្ចាស់ជយលាភីដំបូងគេបង្អស់នៃកម្មវិធីប្រឡងចម្រៀងរ៉េបដ៏ធំ RAPPER FIGHTER? កុំភ្លេចរង់ចាំតាមដានទស្សនាការប្រកួតវគ្គផ្តាច់ព្រ័ត្រឱ្យបានច្រើនកុះករ ហើយលោកអ្នកក៏អាចចូលរួមទស្សនាការប្រកួតវគ្គផ្តាច់ព្រ័ត្រកម្មវិធី RAPPER FIGHTER ដោយសេរី នៅទី២ ខែកុម្ភៈ ឆ្នាំ២០២៥ ខាងមុខនេះ ដែលនឹងធ្វើការផ្សាយផ្ទាល់ នៅ ដឹ ព្រេមៀ សេនធ័រ សែនសុខ៕

អត្ថបទ៖ រ៉ាត់ ចាន់ធីតា រូបភាព៖ ភីអិនអិន