ថ្ងៃព្រហស្បតិ៍ ទី២៣ ខែមករា ឆ្នាំ២០២៥

រថយន្តដឹកជំនួយច្រើនជាង២៤០០គ្រឿងចូលតំបន់ហ្គាហ្សាក្រោមកិច្ចព្រមព្រៀងបទឈប់បាញ់

 

 

រថយន្តដឹកជំនួយមនុស្សធម៌ជិត៩០០គ្រឿង បានចូលតំបន់ហ្គាហ្សានៅថ្ងៃអង្គារ(២១មករា)ដែលជាថ្ងៃទី៣នៃកិច្ចព្រមព្រៀងបទឈប់បាញ់រវាងប្រទេសអ៊ីស្រាអ៊ែល និងក្រុមប៉ាឡេស្ទីនហាម៉ាស់។ 

 

រថយន្តដឹកជំនួយមនុស្សធម៌ថ្មីចុងក្រោយបំផុតនេះ  បានធ្វើឱ្យរថយន្តដឹកជំនួយចូលតំបន់ហ្គាហ្សាសរុបរយៈពេល៣ថ្ងៃ មានចំនួនច្រើនជាង២៤០០គ្រឿង។ 

 

ក្នុងសង្គ្រាមរយៈពេល១៥ខែ កន្លងមកនេះ, អង្គការសហប្រជាជាតិ បានចាត់ទុកប្រតិបត្តិការមនុស្សធម៌របស់ខ្លួនជាឱកាសនិយមប្រឈមនិងបញ្ហាជាច្រើនជាមួយយោធាអ៊ីស្រាអ៊ែល, ការរឹតត្បិតចូលហ្គាហ្សាពីសំណាក់ប្រទេសអ៊ីស្រាអ៊ែល និងបញ្ហាលួចពីក្រុមជនប្រដាប់អាវុធ។ 

 

លោក Muhannad Hadi មន្ត្រីជាន់ខ្ពស់ទទួលបន្ទុកជំនួយអង្គការសហប្រជាជាតិសម្រាប់តំបន់ហ្គាហ្សា និងតំបន់វ៉េសប៉េង បានលើកឡើងថា មានហេតុការណ៍លួច ទម្រង់តូចៗបានកើតឡើងកាលពី៣ថ្ងៃមុន ប៉ុន្តែមិនមានស្ថានភាពធ្ងន់ធ្ងរដូចកាលកន្លងមក។ 

 

ការិយាល័យអង្គការសហប្រជាជាតិសម្រាប់ការសម្របសម្រួលកិច្ចការមនុស្សធម៌ ឱ្យដឹងថា រថយន្តជំនួយ៨៩៧គ្រឿង បានបើកចូលតំបន់ហ្គាហ្សានៅថ្ងៃអង្គារ ដោយដកស្រង់ដំណឹងដែលការិយាល័យទទួលបានពីប្រទេសអ៊ីស្រាអ៊ែលនិងប្រទេសធានាកិច្ចព្រមព្រៀងបទឈប់បាញ់មានសហរដ្ឋអាមេរិក អេហ្ស៊ីប និងកាតា។ 

 

នៅថ្ងៃអាទិត្យ រថយន្តដឹកជំនួយចូលតំបន់ហ្គាហ្សា មានចំនួន៦៣០គ្រឿង និងនៅថ្ងៃច័ន្ទមានចំនួន៩១៥គ្រឿង។ 

 

 

 

 

ប្រែសម្រួល៖ណាវ័ន្ត

ព័ត៌មានដែលទាក់ទង

© រក្សា​សិទ្ធិ​គ្រប់​យ៉ាង​ដោយ​ PNN ប៉ុស្ថិ៍លេខ៥៦ ឆ្នាំ 2025