ថ្លែងនៅមុនពេលមួយថ្ងៃនៃការស្បថចូលកាន់តំណែងប្រធានាធិបតីអាម៉េរិកសម្រាប់អាណត្តិ ៤ ឆ្នាំនៅសេតវិមាន លោក ត្រាំ កាលពីថ្ងៃអាទិត្យ បានប្រាប់ក្រុមអ្នកគាំទ្រដែលស្រែកហ៊ោកញ្ជ្រៀវរាប់ពាន់នាក់នៅក្នុងពិធីជួបជុំបែបយុទ្ធនាការមួយថា លោកនឹង «ស្បថចូលកាន់តំណែងរួមគ្នា» ជាមួយនឹងពួកគេទាំងអស់គ្នា។

លោក ត្រាំ បាននិយាយនៅឯការជួបជុំអបអរជ័យជម្នះនៅទីក្រុងវ៉ាស៊ីនតោនឌីស៊ីថា ពួកគេទាំងអស់នឹងស្បថចូលកាន់តំណែងជាមួយនឹងគ្នាដើម្បីបង្ហាញថា ពួកគេគឺជាមនុស្សដ៏អស្ចារ្យបំផុតគ្រប់ពេលវេលា ដូច្នេះហើយពួកគេនឹងស្បថជាមួយនឹងគ្នានៅថ្ងៃនេះ។ លោក ត្រាំ បានបន្ថែមថា លោកនឹងតំណាងឱ្យពួកគេទាំងអស់ក្នុងនាមជាប្រធានាធិបតីអាម៉េរិកទី៤៧ ហើយពួកគេនឹងរួមគ្នាធ្វើឱ្យសហរដ្ឋអាម៉េរិកជាប្រទេសដ៏អស្ចារ្យម្ដងទៀត។

ក្នុងពេលនោះដែរ លោក ត្រាំ បានសន្យាដែរថា នៅក្នុងពេលកាន់អំណាចរយៈពេល១០០ថ្ងៃដំបូង លោកនឹងផ្ដោតសំខាន់លើបញ្ហាអន្តោប្រវេសន៍ដោយប្ដេជ្ញាថានឹងបំពេញឱ្យបានយ៉ាងឆាប់រហ័សតាមអ្វីដែលលោកបានសន្យាក្នុងយុទ្ធនាការបោះឆ្នោតប្រធានាធិបតី។ លោក ត្រាំ បាននិយាយថា នៅពេលព្រះអាទិត្យបានលិចផុតពីទឹកដីអាម៉េរិក នៅថ្ងៃចន្ទនេះហើយ ការឈ្លានពានលើសហរដ្ឋអាម៉េរិកនឹងដល់ទីបញ្ចប់ហើយ។

សូមរំលឹកថា លោក ត្រាំ ធ្លាប់បានសន្យាក្នុងយុទ្ធនាការរបស់លោកថានឹងចាប់ផ្តើមកិច្ចខិតខំនិរទេសជនអន្តោប្រវែសដ៏ធំបំផុតនៅក្នុងប្រវត្តិសាស្រ្តរបស់អាម៉េរិកដែលនឹងត្រូវបណ្ដេញជនអន្តោប្រវេសន៍រាប់លាននាក់។ ទោះជាយ៉ាងណា ប្រតិបត្តិការនៃយុទ្ធនាការនេះទំនងជានឹងត្រូវការពេលយូរឆ្នាំ ហើយថែមទាំងត្រូវចំណាយប្រាក់ច្រើនទៀតផង៕

ប្រែសម្រួល៖ ប៉ិច ស៊ីនួន