ពិតជាពិសេសខ្លាំងណាស់ នៅបំណាច់ឆ្នាំ២០២៤នេះ K’ve Entertainment បានរៀបចំការប្រគុំតន្ត្រី K-wave End Year Concert 2024 នៅបរិវេនខាងក្រៅ ដែលអនុញ្ញាតឱ្យសាធារណជនអាចចូលរួមលេងកម្សាន្តដោយស៊េរី។ជារៀងរាល់ឆ្នាំ K’ve Entertainment (ខេវី អ៊ិនធើធិនមិន) តែងតែរៀបចំការប្រគុំតន្រ្តីដ៏ធំនៅចុងបំណាច់ឆ្នាំ ដើម្បីផ្តល់ការកម្សាន្ត និងភាពសប្បាយរីករាយដល់សាធារណជន ពិសេសយុវវ័យអ្នកស្នេហាវិស័យ K-POP នៅកម្ពុជា។

តួយ៉ាង ការប្រគុំតន្រ្តីចុងឆ្នាំ K-wave End Year Concert 2024 របស់ K’ve Entertainment ត្រូវបានប្រារព្ធឡើងយ៉ាងអធិកអធម កាលពីល្ងាចថ្ងៃទី២១ ខែធ្នូ កន្លងទៅ នៅទីតាំង Booyoung Town ដែលឆ្នាំនេះមានសិល្បករល្បីៗជាច្រើនរូបរួមមាន៖ កញ្ញា Mina, លោក BOBO, ក្រុមចម្រៀង OMG, ក្រុម OneTime, លោក Lee Seong il ក្រុមរាំ The Bling បានចូលរួមញ៉ាំងការប្រគុំតន្រ្តីឱ្យកាន់តែមានភាពសប្បាយរីករាយ និងភាពរស់រវើកខ្លាំងឡើង។

មែនទែនទៅ នេះជាលើកដំបូងបង្អស់ដែល K’ve Entertainment រៀបចំឱ្យមានការប្រគុំតន្ត្រីនៅបរិវេនខាងក្រៅបែបនេះ ដែលអនុញ្ញាតឱ្យសាធារណជនអាចចូលរួមទស្សនាការប្រគុំតន្ត្រីដោយស៊េរី ដើម្បីទទួលយកភាពសប្បាយរីករាយជាមួយការបកស្រាយបទចម្រៀង និងការរាំចង្វាក់ K-POP ពីសំណាក់សិល្បករល្បីៗរបស់ K’ve Entertainment។ នេះបើតាមការលើកឡើងរបស់ អ្នកស្រី ណា យុនចុង ម្ចាស់ផលិតកម្ម K’ve Entertainment។

ឆ្លៀតឱកាសនេះ ក្រុមរាំល្បីៗដូចជា OMG , OneTime , សិល្បករទោល BOBO ដែលទើបផ្លាស់ឈ្មោះមកជា B.O និងនារីកូរ៉េ បានបង្ហាញអារម្មណ៍រំភើបរីករាយ ដែលឆ្នាំនេះពួកគេមានឱកាសបានបកស្រាយចម្រៀង និងបង្ហាញក្បាច់រាំ K-POP នៅបរិវេនខាងក្រៅ ហើយពិតជារំភើបពេលដែលបានឮសម្លេងស្រែកហ៊ោកញ្ជ្រាវរបស់ពុកម៉ែបងប្អូនដែលមកចូលរួមទស្សនាផ្ទាល់នៅទីតាំងនៃការប្រគុំតន្រ្តី។

ដើម្បីបង្កើតភាពសប្បាយរីករាយ និងអនុស្សាវរីយ៍ល្អៗរវាងគ្នានិងគ្នា សិល្បករល្បីៗរបស់ K’ve Entertainment បាននាំគ្នាបកស្រាយបទចម្រៀង Original song ជាច្រើនបទ រួមទាំងការ Cover បទចម្រៀងកូរ៉េល្បីៗ អមដោយការរាំចង្វាក់ K-POP ដ៏រស់រវើកក្នុងការប្រគុំតន្ត្រី K-wave End Year Concert 2024។

មិនតែប៉ុណ្ណោះ សិល្បករវ័យក្មេងពេញដោយសមត្ថភាពទាំងអស់ ក៏បានជជែកលេងជាមួយអ្នកគាំទ្ររបស់ពួកគេ បង្ហាញពីភាពស្និទ្ធស្នាល សម្រាប់ស្វាគមន៍ឆ្នាំថ្មី២០២៥ជាមួយគ្នាផងដែរ។ 

សិល្បករវ័យក្មេងរបស់ K’ve Entertainment សង្ឃឹមថា ពុកម៉ែបងប្អូន និងបណ្តាអ្នកគាំទ្រទាំងអស់ ពេញចិត្តនូវកាដូចុងឆ្នាំដែលគ្រប់គ្នាបានផ្តល់ឱ្យតាមរយៈការសម្តែងក្នុងការប្រគុំតន្ត្រី K-wave End Year Concert 2024 ហើយកុំភ្លេចរង់ចាំអ៊ុតមើលស្នាដៃបទចម្រៀង និងក្បាច់រាំថ្មីៗរបស់ពួកគេដែលត្រៀមបង្ហាញជូននៅឆ្នាំ២០២៥ខាងមុខនេះ៕

អត្ថបទ៖ រ៉ាត់ ចាន់ធីតា រូបភាព៖ ឃាង ទូច