គ្រាប់រ៉ុកកែតច្រើនជាង២០០ ត្រូវបានបាញ់ចេញពីប្រទេសលីបង់ ទៅលើតំបន់ភាគខាងជើង និងភាគកណ្តាលប្រទេសអ៊ីស្រាអ៊ែល នៅថ្ងៃអាទិត្យ(២៤វិច្ឆិកា) បន្សល់ការខូចខាត និងមនុស្សរងរបួស នៅទីកន្លែងជាច្រើន។ យោងយោធាអ៊ីស្រាអ៊ែល និងទីភ្នាក់ងារសង្គ្រោះបន្ទាន់។ 

នៅទីក្រុង Petah Tikva ភាគកណ្តាលប្រទេសអ៊ីស្រាអ៊ែល នៅជិតទីក្រុងTel Aviv មានការខូចខាតយ៉ាងធំកើតឡើង ក្រោយរ៉ុកកែត១គ្រាប់ បាញ់ចំលើតំបន់ប្រជាជនរស់នៅ។ ក្រៅពីការខូចខាត នៅទីក្រុងនេះមានមនុស្ស៦នាក់រងរបួស។ 

នៅទីក្រុងNahariya ភាគខាងជើងប្រទេសអ៊ីស្រាអ៊ែល , មន្ត្រីប៉ូលីស និងក្រុមគ្រូពេទ្យ បានប្រញ៉ាប់ប្រញ៉ាល់ទៅតំបន់ប្រជាជនរស់នៅ ដែលរ៉ុកកែតបាញ់ចំ។ 
 

ទីក្រុង Haifa ទីក្រុងធំបំផុតទី៣របស់ប្រទេសអ៊ីស្រាអែល មានមនុស្ស៣នាក់រងរបួសនៅទីតាំងរ៉ុកកែតបាញ់ចំ។ 
 

ជម្លោះ បានចាប់ផ្តើមនៅពេលក្រុម Hezbollah ដែលជាសម្ព័ន្ធមិត្តដ៏សំខាន់បំផុតរបស់រដ្ឋាភិបាលទីក្រុង Tehran នៅក្នុងតំបន់, បានបើកការបាញ់ប្រហារបង្ហាញពីសាមគ្គីភាពជាមួយក្រុម Hamas ដែលជាសម្ព័ន្ធមិត្តប៉ាឡេស្ទីន ក្រោយក្រុមហាម៉ាស់បើកការវាយប្រហារលើប្រទេសអ៊ីស្រាអ៊ែលនៅភាគខាងត្បូងនៅថ្ងៃ៧តុលាឆ្នាំ២០២៣។

អ្នក​សម្រុះសម្រួល​អាមេរិក​ម្នាក់ ​បាន​ធ្វើ​ដំណើរ​ទៅ​ប្រទេស​លីបង់ និង​អ៊ីស្រាអែល​ នៅ​សប្តាហ៍​នេះជាកិច្ច​ខិតខំប្រឹងប្រែង​មួយ​ដើម្បីសម្រេចឱ្យ​បាន​កិច្ចព្រមព្រៀងបទ​ឈប់​បាញ់។ ប្រេសិតអាមេរិកលោក Amos Hochstein បានបង្ហាញពីវឌ្ឍនភាព ក្រោយកិច្ចប្រជុំនៅទីក្រុង Beirut  មុនពេលទៅជួបលោកBenjamin Netanyahu នាយករដ្ឋមន្ត្រីអ៊ីស្រាអែល និងរដ្ឋមន្ត្រីការពារជាតិអ៊ីស្រាអែល លោកIsrael Katz។

ប្រែសម្រួល៖ណាវ័ន្ត