កំពូលតារាសម្ដែងភាពយន្តបាញ់ប្រហារ Tom Cruise កំពុងត្រៀមត្រលប់មកបង្ហាញការសម្ដែងផ្សងគ្រោះថ្នាក់របស់ខ្លួនសាជាថ្មីតាមរយៈខ្សែភាពយន្ត “Mission: Impossible” វគ្គ៨។

ថ្មីៗនេះក្រុមហ៊ុន Paramount Pictures ទើបតែបានចេញផ្សាយវីដេអូ Trailer ពេញលេញផ្លូវការសម្រាប់ភាពយន្ត "Mission: Impossible វគ្គ The Final Reckoning" ដោយមានតារាសម្ដែង Tom Cruise វិលត្រលប់មកកាន់តំណែងតួឯក និងតួនាទីជាផលិតករឈុតឆាក Action។

ក្នុង Trailer វគ្គ៨ ដែលអាចជាវគ្គចុងក្រោយនៃស៊េរីភាពយន្តបេសកកម្មផ្សងគ្រោះថ្នាក់មួយនេះ បានបង្ហាញនូវឈុតឆាកគួរឱ្យស្រៀវសាច់ជាច្រើនរបស់តួអង្គកំពូលអ្នកស៊ើបអង្កេត Ethan Hunt (អ៊ីថាន់ ហាន់) ដែលសម្ដែងដោយ Tom Cruise មានទាំងឈុតឆាកក្នុងទឹក ឈុតវាយគ្នាដោយកាំបិត និងព្យួរខ្លួនពីលើយន្តហោះជាដើម។

ភាពយន្តនេះក៏មានការវិលត្រលប់មកវិញរបស់តួសម្ដែងពីវគ្គមុនៗរួមមានតារាសម្ដែង Angela Bassett (អេនជេឡា បាសេត), Hayley Atwell (ហេឡេ អាតវេល) និង Simon Pegg (សាយមិន ផេក) ផងដែរ។ភាពយន្ត " Mission: Impossible វគ្គ The Final Reckoning" នឹងចេញបញ្ចាំងទូទាំងពិភពលោកចាប់ពីថ្ងៃទី ២៣ ខែឧសភា ឆ្នាំ២០២៥។

គួររំឭកថា ភាពយន្ត “Mission: Impossible” បានចាប់ផ្ដើមចេញវគ្គដំបូងតាំងពីឆ្នាំ១៩៩៦ និងអាចរកចំណូលសម្រាប់វគ្គកន្លងៗមកបានសរុបជាង ៤ ពាន់លានដុល្លារនៅទូទាំងពិភពលោក ហើយជារឿយៗត្រូវបានគេលើកឡើងថាជាស៊េរីខ្សែភាពយន្ត Action ដ៏ល្អបំផុតមួយក្នុងប្រវត្តិសាស្ត្រ។ ក្នុងនោះ ភាពយន្តទីប្រាំមួយមានចំណងជើងថា Fallout ដែលចេញកាលពីឆ្នាំ ២០១៨ គឺជាវគ្គដែលអាចរកចំណូលបានខ្ពស់ជាងគេ ពោលគឺរហូតដល់ ៧៩១ លានដុល្លារ ៕

ប្រែសម្រួល៖ វ៉ាន់ថន