តារាចម្រៀងប៉ុបអាមេរិកដ៏ល្បី Ariana Grande បានចេញមុខសម្ពោធភាពយន្តខ្នាតធំរបស់ខ្លួនមានចំណងជើងថា “Wicked” ជាមួយនឹងតារាសម្ដែងល្បីៗជាច្រើនទៀត នៅទីក្រុងស៊ីដនី។

តារាសម្ដែងសំខាន់ៗពីភាពយន្តបែបអភិនីហារ “Wicked” បានបង្ហាញខ្លួនលើកម្រាលព្រំនិងឥដ្ឋពណ៌លឿងសម្រាប់ពិធីសម្ពោធបញ្ចាំង និងផ្សព្វផ្សាយភាពយន្តនេះនៅទីក្រុងស៊ីដនី កាលពីល្ងាចថ្ងៃទី៣ ខែវិច្ឆិកា។

អ្នកគាំទ្ររាប់រយនាក់បានតម្រង់ជួរជាច្រើនម៉ោងដើម្បីបានជួបផ្ទាល់ជាមួយតួសំខាន់ៗរបស់ភាពយន្តគឺ Ariana Grande (អារីអាណា ហ្ក្រេនដេ) និងតារាសម្ដែងស្រីអង់គ្លេស Cynthia Erivo (ស៊ីនធីអ្ហា រីវ៉ូ) អមដំណើរដោយតារាសម្ដែងផ្សេងទៀតដូចជា Jeff Goldblum (ជេហ្វ ហ្គោលប្ល៊ុម), Ethan Slater (អ៊ីធេន ស្លេតធឺ), Jonathan Bailey (ចូណាថាន ប៊េលី) និង Marissa Bode (ម៉ារីសា បូត)។

ភាពយន្ត “Wicked” ត្រូវបានផលិតឡើងដោយផ្អែកសាច់រឿងតាមសៀវភៅប្រលោមលោកចំណងជើងដូចគ្នារបស់អ្នកនិពន្ធ Gregory Maguire (ក្រេហ្គឺរី ម៉េហ្កាយអឺ) ដោយមានសាច់រឿងរៀបរាប់ពីដំណើរផ្សងព្រេង និងមិត្តភាពរវាងនារីស្បែកបៃតងឈ្មោះ Elphaba (អ៊េលហ្វាបា) សម្ដែងដោយតារាអង់គ្លេស Cynthia Erivo (ស៊ីនធីអ្ហា រីវ៉ូ) និងសិស្សស្រីធម្មតាឈ្មោះ Glinda (គ្លីនដា) សម្ដែងដោយ Ariana Grande (អារីអាណា ហ្ក្រេនដេ)។ 

ចំណាយដើមទុនផលិតអស់ ១៤៥ លានដុល្លារ ភាពយន្តនេះគឺជាការវិលត្រលប់មកកាន់ផ្ទាំងសំពត់សលើកដំបូងរបស់ម្ចាស់បទ “7 Ring” គឺតារាចម្រៀង Ariana Grande បន្ទាប់ពីភាពយន្ត “Don’t Look Up” កាលពីឆ្នាំ២០២១ ហើយក៏ជាភាពយន្តខ្នាតធំដំបូងដែរដែលតារាស្រីវ័យ ៣១ ឆ្នាំរូបនេះបានសម្ដែងជាតួឯកក។ ភាពយន្ត "Wicked" គ្រោងនឹងចាក់បញ្ចាំងតាមបណ្ដារោងភាពយន្តទូទាំងពិភពលោក នៅថ្ងៃទី ២២ ខែវិច្ឆិកា ខាងមុខ ៕

ប្រែសម្រួល៖ វ៉ាន់ថន