ថ្ងៃពុធ ទី២៣ ខែតុលា ឆ្នាំ២០២៤
ថ្ងៃពុធ ទី២៣ ខែតុលា ឆ្នាំ២០២៤
សភាវៀតណាម បានបោះឆ្នោតកាលពីថ្ងៃចន្ទ(២១តុលា)ជ្រើសយកឧត្តមសេនីយ៍ Luong Cuong ជាប្រធានាធិបតីថ្មី នៃប្រទេសវៀតណាម។ នេះជាចំណាត់ការរំពឹងទុកយ៉ាងទូលំទូលាយដែលសង្ឃឹមថានឹងធ្វើឱ្យមានស្ថិរភាពនៅក្នុងនយោបាយប្រទេសវៀតណាម ក្រោយដំណាក់កាលដ៏ចលាចលនៃការចាកចេញ និងរុះរើគណៈរដ្ឋមន្ត្រី។
លោក Cuong អាយុ ៦៧ ឆ្នាំ បានចូលកាន់តំណែងនេះបន្តពីលោក To Lam។
អតីតប្រធានាធិបតិវៀតណាមបញ្ចប់អណត្តិត្រឹមថ្ងៃ២១តុលា២០២៤, លោក To Lam ត្រូវបានជ្រើសរើសជាប្រធានាធិបតីវៀតណាមដែលជាប្រទេសកំម្មុយនីស្តកាន់អំណាចដោយគណបក្សតែមួយ កាលពីខែឧសភានិងបន្ទាប់មកកាន់តំណែងប្រធានបក្សដែលជាមុខងារមានអំណាចបំផុត ក្រោយការស្លាប់របស់លោក Nguyen Phu Trongនៅខែកក្កដា។
លោក Cuong ត្រូវបានជ្រើសរើសដោយសម្លេងគាំទ្រពីសមាជិកសភា៤៤០នាក់ ដែលចូលប្រជុំសភានៅថ្ងៃច័ន្ទ។
មុនពេលបោះឆ្នោត, លោក Cuong បានកាន់តំណែងសំខាន់មួយនៅក្នុងលេខាធិការដ្ឋាននៃបក្សកុម្មុយនិស្ត ដែលធ្វើឱ្យលោកក្លាយជាមន្ត្រីជាន់ខ្ពស់បំផុតលំដាប់ទី៥ របស់ប្រទេសវៀតណាម បន្ទាប់ពីប្រធានបក្ស, ប្រធានាធិបតី,នាយករដ្ឋមន្ត្រី និងប្រធានសភា។
លោក Cuong ក៏ជាសមាជិកគណៈកម្មាធិការមជ្ឈិមបក្ស ដែលជាស្ថាប័នធំក្នុងការធ្វើសេចក្តីសម្រេចផ្សេងៗរបស់បក្សកំម្មុយនីស្តវៀតណាម។
ប្រែសម្រួល៖ណាវ័ន្ត