ថ្ងៃសុក្រ ទី១៨ ខែតុលា ឆ្នាំ២០២៤
ថ្ងៃសុក្រ ទី១៨ ខែតុលា ឆ្នាំ២០២៤
ខណៈកំពុងស្ថិតក្នុងពន្ធនាគាររង់ចាំការកាត់ទោសនៅខែឧសភា ឆ្នាំ ២០២៥ តារារ៉េបនិងផលិតករតន្ត្រីល្បីឈ្មោះអាមេរិក P. Diddy ថ្មីៗនេះបានរងបណ្ដឹងចោទប្រកាន់ចំនួន ៦បន្ថែមទៀតពាក់ព័ន្ធការរំលោភ និងបៀតបៀនផ្លូវភេទ។
កាលពីថ្ងៃទី ១៤ ខែតុលា លោក Tony Buzbee (ថូនី បាស្ប៊ី) ជាមេធាវីតំណាងឱ្យជនរងគ្រោះជាង ១២០ នាក់រួមទាំងក្មេងប្រុសអាយុ ៩ ឆ្នាំម្នាក់ដែលបានចោទប្រកាន់ តារារ៉េប Sean Combs (ស្ហន ខមស៍) ឬ P. Diddy ពីបទរំលោភផ្លូវភេទ និងការបំពានផ្សេងៗទៀត បានឱ្យដឹងថាជនរងគ្រោះទើបដាក់ពាក្យបណ្ដឹងចុងក្រោយមានបុរសចំនួន ៤ នាក់ និងស្ត្រី ២ នាក់។
ដោយមិនបានបង្ហាញអត្តសញ្ញាណ ជនរងគ្រោះទាំងនោះបានចោទប្រកាន់ថាពួកគេត្រូវបានគេរំលោភបំពានផ្លូវភេទ និងកេងចំណេញផលប្រយោជន៍ដោយ Diddy ក្នុងពេលខុសៗគ្នាពីចន្លោះឆ្នាំ ១៩៩៥ រហូតដល់ឆ្នាំ ២០២១។ទស្សនាវដ្ដីអាមេរិក People បានលាតត្រដាងព័ត៌មានលម្អិតមួយចំនួនក្នុងឯកសារបណ្តឹង ដោយនារីរងគ្រោះម្នាក់បានបង្ហើបថា ក្នុងឆ្នាំ ២០០៤ នៅពេលដែលនាងមានអាយុ ១៩ ឆ្នាំ P. Diddy បានអញ្ជើញនាង និងមិត្តភ័ក្ដិស្រីម្នាក់ទៀតទៅសណ្ឋាគារមួយនៅសង្កាត់ Manhattan ក្រុងញូវយ៉ក ហើយក៏បង្ខំឱ្យពួកគេផឹកស្រា និងប្រើប្រាស់គ្រឿងញៀន មុននឹងចាប់រំលោភនិងគំរាមកំហែងអាយុជីវិត។
ចំណែកករណីរបស់នារីរងគ្រោះម្នាក់ទៀតបានកើតឡើងនៅក្នុងឆ្នាំ ១៩៩៥ ដោយនាងបានចោទប្រកាន់ P. Diddy ពីបទរំលោភនាងនៅក្នុងបន្ទប់ទឹកនៅឯពិធីជប់លៀងមួយក្នុងទីក្រុងញូវយ៉ក។ ក្រោយធ្វើសកម្មភាពរួច P. Diddy បានដើរចេញ ធ្វើដូចជាគ្មានអ្វីកើតឡើង និងបានគំរាមនាងថា "កុំប្រាប់នរណាម្នាក់អំពីរឿងនេះ មិនដូច្នេះទេ នាងនឹងបាត់ខ្លួន”។
លើសពីនេះ ប្រភពព័ត៌មានក៏បានចេញផ្សាយឯកសារពីពាក្យបណ្តឹងពីជនរងគ្រោះជាបុរសដែលចោទប្រកាន់ថា P. Diddy បានរំលោភខ្លួនក្នុងឆ្នាំ ១៩៩៨ នៅពេលដែលរូបគេមានអាយុ ១៦ ឆ្នាំ។ ជនរងគ្រោះរូបនេះបាននិយាយថាខ្លួនត្រូវបានអញ្ជើញឱ្យចូលរួមពិធីជប់លៀងមួយ ហើយ P. Diddy បានយករូបគេទៅរំលោភក្នុងបន្ទប់ឯកជន ដោយប្រើអំណាចនិងពាក្យបោកបញ្ឆោតថានឹងជួយឱ្យគេបានក្លាយជាតារា ៕
ប្រែសម្រួល៖ វ៉ាន់ថន