ថ្ងៃសុក្រ ទី១៨ ខែតុលា ឆ្នាំ២០២៤
ថ្ងៃសុក្រ ទី១៨ ខែតុលា ឆ្នាំ២០២៤
សមាជិកក្រុម BLACKPINK, Jennie បានគ្រងចំណាត់ថ្នាក់លេខ១ លើតារាង iTunes ៥៩ ប្រទេសជាមួយបទថ្មី “Mantra” ថែមទាំងអាចបំបែកកំណត់ត្រាលើ Spotify ទៀតផង។
ទំព័រព័ត៌មានតន្ត្រី Chart Data រាយការណ៍ថា បទ "Mantra" (ម៉ានត្រា) របស់ Jennie បានបង្កើតកំណត់ត្រាថ្មីនៅលើ Spotify ដោយបានក្លាយជាបទចម្រៀងពីតារាខេប៉ុបទោលស្រីដែលទទួលបានការចូលស្ដាប់ខ្ពស់បំផុតក្នុងប្រវត្តិសាស្ត្រសម្រាប់រយៈពេល ២៤ ម៉ោងដំបូង ពោលគឺរហូតដល់ ៥,២៤ លានដង។
ក្នុងថ្ងៃចេញផ្សាយ បទចម្រៀង “Mantra” បានបង្ហាញខ្លួននៅលេខ ៥ នៅលើតារាង Top 50 Global របស់ Spotifyខណៈក្រុមហ៊ុន Odd Atelier (អត អឹតថេលៀ) ដែលជាទីភ្នាក់ងាររបស់សមាជិក BLACKPINK រូបនេះផ្ទាល់ បានឱ្យដឹងទៀតថា “Mantra” គឺបទចម្រៀងរបស់តារាចម្រៀងខេប៉ុបស្រីទោលដំបូងដែលអាចឡើងដល់ចំណាត់ថ្នាក់លេខ ១ នៅលើតារាង iTunes របស់សហរដ្ឋអាមេរិកក្នុងឆ្នាំនេះ។
បើក្រឡេកតារាង iTunes ជុំវិញពិភពលោក បទចម្រៀងនេះបានឡើងដល់លេខ ១ ចំនួន ៥៩ ប្រទេស គិតត្រឹមថ្ងៃទី១៤ ខែតុលា ដោយក្នុងនោះរួមមានទាំងប្រទេសអាហ្សង់ទីន ប្រ៊ុយណេ កម្ពុជា ឈីលី ក្រិច ម៉ាឡេស៊ី ហ្វីលីពីន ថៃ វៀតណាម និងប្រទេសជាច្រើនទៀត។
គួរបញ្ជាក់ថា បទ "Mantra" គឺជាបទទោលដំបូងរបស់ Jennie ដែលបានចេញក្នុងរយៈពេលជាង១ឆ្នាំចុងក្រោយគិតចាប់តាំងពីបទ “You & Me” បានចេញកាលពីខែតុលាឆ្នាំមុន។
បទថ្មីនេះមានអត្ថន័យលើកទឹកចិត្តឱ្យមនុស្សគ្រប់គ្នាអាចបញ្ចេញពន្លឺតាមវិធីផ្ទាល់ខ្លួនរៀងៗខ្លួន ដោយបង្ហាញពីសារនៃការស្រឡាញ់ខ្លួនឯង និងការគាំទ្រគ្នាទៅវិញទៅមក។ បទនេះដែរក៏ជាបទដំបូងសម្រាប់ការសហការគ្នារវាងក្រុមហ៊ុន Odd Atelier របស់ Jennie និងក្រុមហ៊ុនចម្រៀងអាមេរិក Columbia Records ផងដែរ ៕
ប្រែសម្រួល៖ វ៉ាន់ថន