នាយករដ្ឋមន្ត្រីថៃ បានថ្លែងថា រាជរដ្ឋាភិបាលរបស់លោក នឹងចាក់បញ្ចូលទឹកប្រាក់ចំនួន ១៥ពាន់លានដុល្លារអាមេរិក ទៅក្នុងសេដ្ឋកិច្ចនៅឆ្នាំក្រោយ តាមរយៈគោលនយោបាយកាបូបឌីជីថលរបស់ខ្លួន។ នេះបើយោងតាមការចុះផ្សាយនៅលើ សារព័ត៌មានក្នុងស្រុកថៃ នៅថ្ងៃនេះ។

នាយករដ្ឋមន្ត្រីថៃលោក សេដ្ឋា ថាវីស៊ីន បានលើកឡើងថា ប្រជាពលរដ្ឋថៃម្នាក់ៗ ដែលមានអាយុលើសពី ១៦ឆ្នាំនឹងទទួលបានប្រាក់ ២៨២ដុល្លារអាមេរិក ក្នុងទម្រង់ជាលុយឌីជីថល ដើម្បីប្រើប្រាស់ក្នុងសហគមន៍មូលដ្ឋានរបស់ពួកគេ។

លោកបន្តថា ផែនការនេះ អាចស្រោចស្រង់ជីវិត នៅក្នុងសេដ្ឋកិច្ចដែលកំពុងធ្លាក់ចុះ ដោយសារការនាំចេញខ្សោយ និងទំនុកចិត្តរបស់អ្នកវិនិយោគទាប។

យ៉ាងណាមិញ លោកកំពុងស្វែងរកការទាក់ទាញវិនិយោគិននៅក្នុង វិស័យថាមពលបៃតង និងចេញប័ណ្ណបំណុលចំនួន ៨១៦លានដុល្លារអាមេរិក ហើយរាជរដ្ឋាភិបាលថៃ នឹងបន្តកិច្ចសន្យាពាណិជ្ជកម្មសេរីជាបន្តបន្ទាប់។

ជាមួយគ្នានេះ រដ្ឋមន្ត្រីក្រសួងហិរញ្ញវត្ថុថៃ បានបញ្ជាក់ថា រាជរដ្ឋាភិបាល នឹងកាត់បន្ថយតម្លៃអគ្គិសនីបន្ថែមទៀត និងបង្កើនប្រាក់ចំណូលរបស់កសិករ ៣ដង ក្នុងរយៈពេល ៤ឆ្នាំខាងមុខ៕
 

អត្ថបទ៖ ងួន សុភ័ត្រ្តា រូបភាព៖ ឯកសារ