ថ្ងៃសុក្រ ទី២៩ ខែមីនា ឆ្នាំ២០២៤

ក្រុមហ៊ុនផលិតរថយន្តចិន នឹងតម្លើងរោងចក្រផលិតរថយន្តអគ្គិសនីនៅក្នុងប្រទេសវៀតណាម

១៩ ឧសភា ២០២៣ | សេដ្ឋកិច្ច

 

រដ្ឋាភិបាលវៀតណាម បានអះអាងថា ក្រុមហ៊ុនផលិតរថយន្តអគ្គិសនីរបស់ចិន យីហោ BYD (ប៊ី វ៉ាយ ឌី) គ្រោងនឹងវិនិយោគសាងសង់ រោងចក្រផលិតរថយន្តអគ្គិសនីដំបូងរបស់ខ្លួន នៅក្នុងប្រទេសវៀតណាម។ នេះបើយោងតាមការចេញផ្សាយនៅថ្ងៃនេះ របស់ សារព័ត៌មានក្នុងស្រុកវៀតណាម។ បើតាមប្រភពពី សារព័ត៌មាន Reuters បានរាយការណ៍ថា ក្រុមហ៊ុនផលិតរថយន្តអគ្គិសនី BYD របស់ចិន មានគម្រោងបើករោងចក្រនៅក្នុងប្រទេសវៀតណាម ដើម្បីផលិតគ្រឿងបន្លាស់រថយន្តក្នុងគោលបំណងនាំចេញគ្រឿងបន្លាស់ទៅកាន់ រោងចក្រដំឡើងដែលគ្រោងនឹងធ្វើនៅ ប្រទេសថៃ។

 


នៅក្នុងសេចក្តីថ្លែងការណ៍របស់រដ្ឋាភិបាលវៀតណាម ដែលចេញផ្សាយបន្ទាប់ពីជំនួបរវាងស្ថាបនិក និងជាប្រធានក្រុមហ៊ុន BYD ជាមួយនិងឧបនាយករដ្ឋមន្ត្រីវៀតណាម កាលពីដើមខែឧសភា ភាគីក្រុមហ៊ុន បានលើកឡើងថា លោករំពឹងថា វៀតណាម នឹងបង្កើតលក្ខខណ្ឌអំណោយផលសម្រាប់ BYD ដើម្បីបញ្ចប់នីតិវិធីវិនិយោគ។

 


ទោះយ៉ាងណា សេចក្តីថ្លែងការណ៍ មិនបានបញ្ជាក់ថា តើការវិនិយោគថ្មី នឹងបញ្ចូលទឹកប្រាក់ប៉ុន្មានសម្រាប់ការពង្រីកនោះទេ។BYD ដែលបច្ចុប្បន្នដំណើរការរោងចក្រ ដើម្បីដំឡើងឧបករណ៍អេឡិចត្រូនិក និងគ្រឿងបន្លាស់នៅក្នុងខេត្តភាគខាងជើងប្រទេសវៀតណាម ក៏បានស្នើបង្កើតខ្សែសង្វាក់ផ្គត់ផ្គង់ក្នុងស្រុកផងដែរ។

 


យ៉ាងណាមិញ វត្តមានរបស់ក្រុមហ៊ុនចិន BYD នឹងបង្កបញ្ហាប្រឈមដោយផ្ទាល់ចំពោះក្រុមហ៊ុន VinFast ដែលជាក្រុមហ៊ុនផលិតរថយន្តអគ្គិសនី របស់វៀតណាម ដែលបានចាប់ផ្តើមលក់រថយន្តនៅឆ្នាំ ២០១៩ ហើយគ្រោងនឹងពង្រីកនៅសហរដ្ឋអាមេរិក និងអឺរ៉ុប៕
 

 

អត្ថបទ៖ ងួន សុភ័ត្រ្តា រូបភាព៖ ឯកសារ 

 

 

ព័ត៌មានដែលទាក់ទង

© រក្សា​សិទ្ធិ​គ្រប់​យ៉ាង​ដោយ​ PNN ប៉ុស្ថិ៍លេខ៥៦ ឆ្នាំ 2024