ថ្ងៃអង្គារ៍ ទី០២ ខែកញ្ញា ឆ្នាំ២០២៥
ថ្ងៃអង្គារ៍ ទី០២ ខែកញ្ញា ឆ្នាំ២០២៥
សត្វផ្សោតសមុទ្រ ឬត្រីដូហ្វីនរាប់សិបក្បាលបានបង្ហាញខ្លួនដោយលោតលេងនៅលើផ្ទៃទឹកយ៉ាងសប្បាយរីករាយនៅជិតឆ្នេរសមុទ្រវ៉ាល់ផារ៉ៃសូ (Valparaiso) នៅប្រទេសឈីលីកាលពីពេលថ្មីៗនេះដោយធ្វើឱ្យប្រជាពលរដ្ឋមូលដ្ឋាន និងអ្នកធ្វើដំណើរឆ្លងកាត់ទីនោះបានគយគន់ទិដ្ឋភាពដ៏កម្រនេះ។
ប្រជាពលរដ្ឋនិងសាក្សីដែលបានឃើញទិដ្ឋភាពនេះបាននិយាយថា ក្រុមសត្វផ្សោតទាំងនេះត្រូវបានប្រមូលផ្ដុំទៅដោយសត្វផ្សោតមានចំនួនចន្លោះពី ៥០ ទៅ ១០០ ក្បាលដែលទាក់ទាញចំណាប់អារម្មណ៍របស់អ្នកស្រុក និងភ្ញៀវទេសចរយ៉ាងច្រើននៅកំពង់ផែវ៉ាល់ផារ៉ៃសូ (Valparaiso) នៅប្រទេសឈីលី។
រូបភាពវីដេអូរបស់ទូរទស្សន៍ក្នុងស្រុកបានបង្ហាញពីសត្វផ្សោតពណ៌ប្រផេះមួយហ្វូងធំកំពុងហែលទឹកលេងយ៉ាងសប្បាយនៅក្បែរឈូងសមុទ្រ Valparaiso កាលពីពេលថ្មីៗនេះ។
ភ្ញៀវទេសចរម្នាក់និយាយថា រំពេចនោះ ពួកគេបានចាប់ផ្តើមឃើញអ្វីម្យ៉ាងដែលមើលទៅដូចជាសត្វផ្សោតអ៊ីចឹងដែលពួកវាកំពុងលោតលេង ហើយមនុស្សម្នាក៏ចាប់ផ្តើមមើលទិដ្ឋភាពនេះតែម្ដង ហើយគាត់មិនអាចថតបានឡើយដោយសារទូរស័ព្ទដៃរបស់គាត់មិនអស់ថ្ម។
ពលរដ្ឋម្នាក់ទៀតនិយាយថា ពួកគេកំពុងតែបណ្ដើរសត្វឆ្កែ ហើយភ្លាមៗនោះសត្វផ្សោតក៏បានបង្ហាញខ្លួនចេញពីទីនោះតែម្ដង។ វាមានច្រើនណាស់។ ដំបូងឡើយពួកគេគិតថា ទិដ្ឋភាពនោះគឺជាហ្វូងមនុស្សហែលទឹកលេងតែប៉ុណ្ណោះប៉ុន្តែតាមពិតគឺជាហ្វូងត្រីផ្សោតទៅវិញ។
សត្វផ្សោតប្រផេះដែលត្រូវបានគេស្គាល់ថាជាត្រីផ្សោត Risso ផងដែរនោះគឺជាប្រភេទសត្វផ្សោតដែលបង្កកំណើតនៅក្នុងពោះនិងចិញ្ចឹមកូនដោយទឹកដោះនិងចូលចិត្តរស់នៅក្នុងទឹកដែលមានសីតុណ្ហភាពក្តៅល្មមភាគច្រើននៅមហាសមុទ្រឥណ្ឌា ប៉ាស៊ីហ្វិក និងមហាសមុទ្រអាត្លង់ទិក៕
ប្រែសម្រួល៖ ប៉ិច ស៊ីនួន
