ដូចដែលបានដឹងគ្រប់គ្នាហើយថា ទោះបីជាកម្ពុជា ជោគជ័យមួយដំណាក់កាល នៃការប្រយុទ្ធនឹងជំងឺកូវីដ ១៩ ក្តី ក៏កម្ពុជា មិនទាន់មានសុវត្ថិភាពទេ ប៉ុន្តែត្រូវបានមើលឃើញ ជាទូទៅ ដោយរួមទាំងអ្នកធ្វើការលើវិស័យពិការភាពផង បានធ្វេសប្រហែស។ ហេតុនេះ មន្ត្រីធ្វើការវិស័យពិការភាព បានក្រើនរំឭកដល់អ្នកពាក់ព័ន្ធទាំងអស់ មេត្តា ពង្រឹងស្មារតីប្រុងប្រយ័ត្នឡើងវិញ ព្រោះថា ប្រសិនបើជនពិការឆ្លងជំងឺកូវដី ១៩ នោះពួកគេ នឹងប្រឈមនឹងគ្រោះថ្នាក់ធ្ងន់ធ្ងរជាងមនុស្សដទៃ។

គ្រប់ក្រសួងស្ថាប័នជាតិ អន្តរជាតិទាំងអស់ ជាពិសេសអ្នកគ្រប់គ្រងមណ្ឌល ក៏ដូចជាគ្រួសារ និង បុគ្គល ដែលធ្វើការលើវិស័យពិការភាពនៅទូទាំងប្រទេស មេត្តាកុំទម្លាក់ ឬ បន្ធូរបន្ថយដៃឱ្យទាល់តែសោះចំពោះជំងឺកូវដី ១៩ ពោលគឺត្រូវបន្តការប្រុងប្រយ័ត្ន អនុវត្តឱ្យបានខ្ជាប់ខ្ជួននូវវិធានការ ការពារពីជំងឺកូវីដ ១៩ ព្រោះជនមានពិការភាព គឺជាជនងាយរងគ្រោះស្រាប់ទៅហើយ ប្រសិនបើពួកគេឆ្លងជំងឺកូវីដ ១៩ ទៀតនោះ ពួកគេងាយនឹងគ្រោះថ្នាក់ធ្ងន់ធ្ងរ ។ នេះគឺជាការក្រើនរំឭករបស់លោក យៀប ម៉ាលីណូ ប្រធាននាយកដ្ឋានសុខុមាលភាពជនពិការ នៃ ក្រសួងសង្គមកិច្ច ។

សាធារណជនប្រហែលជាមិនទាន់ភ្លេចទេថា ក្នុងចំណោមអ្នកជំងឺកូវីដ ១៩ ចំនួន ១២២ ដំបូងនោះ គឺមានអ្នកជំងឺម្នាក់ដែលត្រូវចំណាយពេលយូរជាងគេ ក្នុងការព្យាបាល ហើយម្នាក់នោះគឺជាស្ត្រីដែលមានបញ្ហាផ្លូវចិត្ត ពោលគឺគាត់ជាជនពិការផ្នែកសតិស្មារតី ហើយនោះចាត់ទុកថាជាសំណាងល្អបំផុតមួយ ដែលទីបំផុតក្រុមគ្រូពេទ្យអាចព្យាបាលទាល់តែជាដោយជោគជ័យ ។ ករណីនោះ ត្រូវបានលោក យៀប ម៉ាលីណូ ក្រើនរំឭកឱ្យអ្នកពាក់ព័ន្ធទាំងឡាយ យកជាមេរៀន ។

សូមជម្រាបថា ជាផ្នែកមួយ នៃ ការក្រើនរំឭកដល់អ្នកពាក់ព័ន្ធឱ្យបន្តការប្រុងប្រយ័ត្នចំពោះជំងឺកូវីដ ១៩ នេះ កាលពីអំឡុងសប្តាហ៍មុន មន្ត្រីក្រសួងសង្គមកិច្ច ដែលក្នុងនោះក៏មានលោក យៀប ម៉ាលណូ ផង បានចុះជួបពិនិត្យតាមដាន និង នាំយកឧបករណ៍ប្រើប្រាស់មួយចំនួន ដូជា ទឹកអាល់កុល ជែល ម៉ាស់ និង Foster អប់រំ ជាដើម ទៅចែកជូនដល់ទីតាំងនានានៅក្នុងខេត្តចំនួន ៩ ជាពិសេសនៅជុំវិញបឹងទន្លេសាប ដែលជាមណ្ឌលប្រមូលផ្តុំសំខាន់ នៃ ជនមានពិការភាព ៕

អត្ថបទ៖ ខឿន សាឃាង