ថ្ងៃសៅរ៍ ទី២៧ ខែមេសា ឆ្នាំ២០២៤
ថ្ងៃសៅរ៍ ទី២៧ ខែមេសា ឆ្នាំ២០២៤
កងកម្លាំងមួកខៀវកម្ពុជាចំនួន ១៨៤នាក់ បានធ្វើដំណើរមកដល់កម្ពុជាវិញហើយ កាលពីយប់ថ្ងៃទី០១ ខែកុម្ភៈ ក្រោយពីបញ្ចប់បេសកកម្មដោយជោគជ័យរយៈពេលពេញ ១ឆ្នាំ នៅប្រទេសលីបង់។ ជាមួយដំណើរត្រលប់មកដល់មាតុភូមិវិញ នៅអាកាសយាន្តដ្ឋានអន្តរជាតិភ្នំពេញ ក្រុមគ្រូពេទ្យនៃក្រសួងសុខាភិបាល សហការជាមួយក្រុមគ្រូពេទ្យរបស់មជ្ឈមណ្ឌលជាតិរក្សាសន្តិភាព បានយកសំណាករបស់កងកម្លាំងទាំងអស់ ដើម្បីវិភាគរកមេរោគកូវិដ១៩ ភ្លាមផងដែរ។
កងកម្លាំងមួកខៀវកម្ពុជា ចំនួន ១៨៤នាក់ ដែលជាកងវិស្វរកម្មពហុជំនាញ បានធ្វើដំណើរមកដល់កម្ពុជាវិញហើយ កាលពីយប់ថ្ងៃទី០១ ខែកុម្ភៈ ក្រោយពីបញ្ចប់បេសកកម្ម ប្រកបដោយជោគជ័យរយៈពេលពេញ១ឆ្នាំនៅប្រទេសលីបង់។ ស្របគ្នាជាមួយដំណើរត្រលប់មកដល់មាតុភូមិវិញ នៅអាកាសយាន្តដ្ឋានអន្តរជាតិភ្នំពេញ កងកម្លាំងមួកខៀវទាំង ១៨៤នាក់ ត្រូវបានក្រុមគ្រូពេទ្យនៃក្រសួងសុខាភិបាល សហការជាមួយក្រុមគ្រូពេទ្យរបស់មជ្ឈមណ្ឌលជាតិរក្សាសន្តិភាពបានយកសំណាករបស់កងកម្លាំងទាំងអស់ ដើម្បីវិភាគរកមេរោគកូវិដ១៩ភ្លាមផងដែរ។
អញ្ជើញទទួលដំណើរមកដល់មាតុភូមិវិញរបស់កងកម្លាំងមួកខៀវកម្ពុជា ដែលត្រលប់ពីប្រទេសលីបង់ ឯកឧត្តម នាយឧត្តមសេនីយ៍ សែម សុវណ្ណនី អគ្គនាយកមជ្ឈមណ្ឌលជាតិគ្រប់គ្រង កងកម្លាំងរក្សាសន្តិភាព បោសសម្អាតមីន និងកាកសំណល់សង្គ្រាម បានបញ្ជាក់ថា ក្រៅពីយកសំណាកទៅវិភាគរកមេរោគកូវិដ១៩ កងកម្លាំងទាំងអស់ ក៏តម្រូវអោយធ្វើចត្តាឡីស័កចំនួន ១៤ថ្ងៃ នៅវិទ្យាស្ថានហ្វឹកហ្វឺនបណ្តុះបណ្តាលកងកម្លាំងរក្សាសន្តិភាពបោសសំអាតមីន និងកាកសំណល់សង្គ្រាម ក្នុងស្រុកឧដុង្គ ខេត្តកំពង់ស្ពឺ មុននឹងអនុញ្ញាតអោយទៅជួបជុំក្រុមគ្រួសារ។
ប្រសិនបើមានសញ្ញាវិជ្ជមាននៃមរោគកូវិដ១៩ ក្រុមគ្រូពេទ្យនឹងបញ្ជូនអ្នកជំងឺនោះ ទៅព្យាបាលនៅមន្ទីរពេទ្យមិត្តភាពខ្មែរសូវៀត ឬមន្ទីរពេទ្យចាក់អង្រែក្រោម។
ឯកឧត្តម នាយឧត្តមសេនីយ៍ បានបន្ថែមទៀតថា កម្ពុជាមានការប្រុងប្រយ័ត្នខ្ពស់ ក្នុងការទប់ស្កាត់ចំពោះការឆ្លងរីករាលដាលមេរោគកូវិដ១៩ នៅពេលផ្លាស់ប្តូរកងកម្លាំង ហើយជំហររបស់កម្ពុជា បើទោះបីជាប្រទេសក្រីក្រ និងកំពុងប្រឈមជាមួយកូវីដ១៩បន្ថែម ដោយប្រទេស ដែលកងទ័ពមួកខៀវកម្ពុជា ត្រូវទៅបំពេញបេសកកម្ម ក៏កំពុងមានការវាយលុកដោយកូវីដ១៩ ក៏ដោយ ក៏រាជរដ្ឋាភិបាលកម្ពុជា និងកងទ័ពរបស់ខ្លួន មិនបោះបង់ចោលភារកិច្ចក្នុងការចូលរួមថែរក្សាសន្តិភាពនៅតាមប្រទេសនានា ក្រោមឆត្ររបស់អង្គការសហប្រជាជាតិនោះឡើយ ពោលគឺកម្ពុជាចូលរួមដោយស្ម័គ្រចិត្ត និងការទទួលខុសត្រូវក្នុង ឋាន:ជាសមាជិកអង្គការសហប្រជាជាតិ។
គួរបញ្ជាក់ថា បច្ចុប្បន្នកម្ពុជាមានកម្លាំងមួកខៀវ សរុបជិត ៨០០នាក់ ក្នុងនោះ មាននារីជិត ៨០នាក់ បាន និងកំពុងបំពេញបេសកកម្មរក្សាសន្តិភាពក្រោមឆ័ត្រអង្គការសហប្រជាជាតិ នៅប្រទេសលីបង់ ស៊ូដង់ខាងត្បូង ម៉ាលី និងសាធារណរដ្ឋអាហ្វ្រិកកណ្តាល៕
អត្ថបទ៖សន រដ្ឋា រូបភាព៖ញិល សុជា