ថ្ងៃច័ន្ទ ទី២៩ ខែមេសា ឆ្នាំ២០២៤
ថ្ងៃច័ន្ទ ទី២៩ ខែមេសា ឆ្នាំ២០២៤
រាជរដ្ឋាភិបាលកម្ពុជា បានសម្រេចលើកពេលរៀបចំវេទិកាទេសចរណ៍អាស៊ាន ឆ្នាំ២០២១ (ASEAN Tourism Forum 2021) ដែលគ្រោង នឹងរៀបចំនាខែមករាខាងមុខ។ វេទិកាទេសចរណ៍អាស៊ាន ដែលកម្ពុជា ធ្វើជាម្ចាស់ផ្ទះ នឹងរៀបចំនៅដើមឆ្នាំ២០២២ វិញ។ ការសម្រេចពន្យារពេលនេះ ដោយសារតែភាពមិនច្បាស់លាស់នៃជំងឺកូវីដ-១៩។
កាលពីថ្ងៃទី២៦ ខែតុលា ឆ្នាំ២០២០ ក្រសួងទេសចរណ៍ បានសរសេរលិខិតស្នើសុំគោលការណ៍ពីរាជរដ្ឋាភិបាល ដើម្បីពន្យារពេលរៀបចំវេទិកាទេសចរណ៍អាស៊ាន ឆ្នាំ២០២១ ដែលរួមមាន ការតាំងពិព័រណ៍ និងកិច្ចប្រជុំផ្សេងៗ ទៅរៀបចំនៅដើមឆ្នាំ២០២២។
ចំពោះការស្នើសុំនេះ ត្រូវបានសម្តេចតេជោ នាយករដ្ឋមន្ត្រី ហ៊ុន សែន បានចារឯកភាព កាលពីថ្ងៃទី៥ ខែវិច្ឆិកា ឆ្នាំ២០២០។ ដូច្នេះហើយ ទើបនៅថ្ងៃទី១១ ខែវិច្ឆិកា ឆ្នាំ២០២០ ទីស្តីការគណៈរដ្ឋមន្ត្រី បានចេញលិខិត ជម្រាបជូនឯកឧត្តម ថោង ខុន រដ្ឋមន្ត្រីក្រសួងទេសចរណ៍ ដោយលើកឡើងថារាជរដ្ឋាភិបាល យល់ព្រម៖ ទី១- អនុញ្ញាតលើកការរៀបចំវេទិកាទេសចរណ៍អាស៊ាន ឆ្នាំ២០២១ ទៅរៀបចំនៅដើមឆ្នាំ២០២២ អាចអំឡុងខែមករា ឬខែបន្តបន្ទាប់ ជំនួសវិញ។ ទី២-ចំពោះការប្រជុំថ្នាក់រដ្ឋមន្រ្តីទេសចរណ៍អាស៊ាន និងថ្នាក់ស្ថាប័នទេសចរណ៍ជាតិអាស៊ាន អនុញ្ញាតឲ្យក្រសួងទេសចរណ៍ រៀបចំកិច្ចប្រជុំជាបន្តបន្ទាប់ តាមប្រព័ន្ធវីដេអូ ខនហ្វើរិន ដើម្បីសម្រេចឯកសារមួយចំនួន ក្នុងនាមជាម្ចាស់ផ្ទះ។
វេទិកាទេសចរណ៍អាស៊ាន បង្កើតឡើង កាលពីឆ្នាំ១៩៨១ ជាព្រឹត្តិការណ៍ដ៏ធំ ដែលប្រទេសសមាជិកអាស៊ាន ប្ដូរវេនគ្នា រៀបចំ ដើម្បីជំរុញកិច្ចសហប្រតិបត្តិការទេសចរណ៍ និងធ្វើឲ្យតំបន់អាស៊ាន ក្លាយជាគោលដៅទេសចរណ៍តែមួយ ប្រកបដោយភាពទាក់ទាញ៕
អត្ថបទ និងរូបភាព៖ ក្រុមការងារព័ត៌មាន PNN
