ថ្ងៃសុក្រ ទី០៣ ខែឧសភា ឆ្នាំ២០២៤
ថ្ងៃសុក្រ ទី០៣ ខែឧសភា ឆ្នាំ២០២៤
គណៈកម្មការរៀបចំការប្រកួត នៃពានរង្វាន់បាល់ទាត់ KMH Champions League និង KMH Cup U18 នៅពុំទាន់ច្បាស់នៅឡើយ ពីអនាគតពានពាក់កណ្ដាលអាជីពទាំង ២នេះ ថាត្រូវបន្ត ឬត្រូវបញ្ឈប់ទាំងស្រុង នៅពេលជំងឺកូវីដ១៩ សាបសូន្យបាត់ទៅ ដ្បិតនៅសល់ពាក់កណ្ដាលរដូវកាលទៀត ទើបរកឃើញជើងឯក។
តាមការឲ្យដឹងពីលោក ផុន សិរីវឌ្ឍនៈ គណៈកម្មការរៀបចំការប្រកួតលើកឡើងថា ត្រូវរង់ចាំមើលភាពស្រាកស្រាន្តរបស់ជំងឺដ៏កាចសាហាវមួយនេះ ព្រោះប្រសិនបើស្ថានការណ៍ដូចសព្វថ្ងៃនៅតែបន្ត នោះនឹងត្រូវពិចារណាបន្ត ឬត្រូវលុបចោលការប្រកួតដែលនៅសេសសល់។
«សម្រាប់បច្ចុប្បន្ន ពីថ្នាក់ដឹកនាំទាំងអស់នៃពាន KMH គាត់ថា យើងនៅរង់ចាំមើលបន្តិចទៀតសិន ព្រោះឥលូវនៅក្នុងខែ ៥នៅឡើយទេ ហើយរយៈពេលពានដែលនៅសេសសល់ទាំងពីរពាន បើកូវីដសះស្បើយទៅ យើងអាចរៀបចំត្រឹម ៣ខែឲ្យចប់ទាំងពីរពាន តែបើជំងឺនេះនៅអូសបន្លាយឆ្ងាយ យើងនឹងពិចារណាបន្តទៀតថាត្រូវបន្ត ឬឈប់។ អ៊ីចឹងយើងអត់ទាន់ច្បាស់ទេ យើងនៅពិចារណានៅឡើយ ព្រោះថាមួយរយៈនេះក្នុងស្រុកយើងអត់មានអ្នកកើតទៀតទេ ចឹងយើងត្រូវរង់ចាំពីក្រសួង និងរាជរដ្ឋាភិបាលវិញ»។
គួររំឭកថា ពានរង្វាន់ KMH Champions League ដែលមាន២៤ក្រុមចូលរួម មានប្រកួតសរុបចំនួន ៩៣ប្រកួត ខណៈ KMH Cup U18 មាន ៨ក្រុមចូលរួម ត្រូវប្រជែងគ្នាចំនួន ៣០ប្រកួត ត្រូវបានផ្អាកដំណើរការ តាំងពីថ្ងៃទី ១៤ ខែមីនា ស្របតាមវិធានការរបស់រាជរដ្ឋាភិបាលក្នុងការបង្ការជំងឺដ៏កាចសាហាវ ដែលបង្កឡើងដោយវីរុសកូរ៉ូណា៕
អត្ថបទ៖ តាំង លីហួរ