ថ្ងៃសៅរ៍ ទី០៤ ខែឧសភា ឆ្នាំ២០២៤
ថ្ងៃសៅរ៍ ទី០៤ ខែឧសភា ឆ្នាំ២០២៤
ក្រសួងធនធានទឹក និងឧតុនិយម បន្តធ្វើការអំពាវនាវ អោយប្រជាពលរដ្ឋ បង្កើនការប្រុងប្រយ័ត្ន ស្របពេលអាកាសធាតុ មានការប្រែប្រួលជាបន្តបន្ទាប់ ដែលអាចបង្កអោយមានភ្លៀងធ្លាក់ច្រើន ស្ទើរពាសពេញផ្ទៃប្រទេស និងមានបាតុភូតផ្គរ រន្ទះ ខ្យល់កន្ត្រាក់ ជាដើម។ តាមសេចក្តីប្រកាស ប្រទេសកម្ពុជាយើង នឹងបន្តទទួលរងឥទ្ធិពលខ្យល់ព្យុះ ដែលបង្កជាភ្លៀងផ្គរ ហើយក៏អាចបង្កជាជំនន់ទឹកភ្លៀង រហូតដល់ថ្ងៃទី២០ ខែតុលា។
យោងតាមសេចក្ដីជូនដំណឹងរបស់ក្រសួងធនធានទឹកចេញផ្សាយនៅថ្ងៃនេះ ប្រព័ន្ធសម្ពាធទាបនឹងបន្តលាតសន្ធឹងលើប្រទេសកម្ពុជា។ ហើយនៅលើប្រទេសចិនខាងត្បូងបានកើតព្យុះទី១៦មានឈ្មោះថាណាងកា ហើយបន្តដំណើរចូលដល់ភាគខាងកើតប្រទេសវៀតណាមចាប់ពីថ្ងៃទី១៥ តុលា ហើយព្យុះថ្មីមួយទៀតនឹងកើតឡើងចាប់ពីថ្ងៃទី១៦ ឬ១៧ខែតុលាឆ្នាំ២០២០ជាព្យុះទី១៧មានកម្លាំងខ្លាំងមានឈ្មោះ សូដែល។ តាមការព្យាករណ៍របស់ក្រសួងធនធានទឹក ព្យុះនេះនឹងបន្ថយឥទ្ធិពលវិញជាបន្តបន្ទាប់ ដោយឆ្លងចូលប្រទេសកម្ពុជាតាមខេត្តរតនៈគិរីក្នុងកម្លាំងជាវិសម្ពាធ និងវិសម្ពាតទាប។
តាមរយៈស្ថានភាពខាងលើ បណ្ដាលអោយបណ្ដាខេត្តនៅតំបន់ទំនាបកណ្ដាល, បណ្ដាខេត្តជាប់ជូរភ្នំដងរែក និងភាគឥសាន្តរួមទាំងតំបន់ជាប់មាត់សមុទ្រមានភ្លៀងធ្លាក់ពីមធ្យមទៅច្រើនលាយឡំដោយខ្យល់បោកបក់ និងរលកសមុទ្រធំៗ ដែលក្រសួងបន្តអំពាវនាវអោយប្រជាពលរដ្ឋមានការប្រុងប្រយ័ត្ន។
ក្រសួងធនធានទឹក ក៏បានអំពាវនាវឱ្យប្រជាពលរដ្ឋដែលរស់នៅអមសងខាងទន្លេសេកុង សេសាន និងទន្លេស្រែពក ក្នុងភូមិសាស្ត្រខេត្តស្ទឹងត្រែងបង្កើនការប្រុងប្រយ័ត្នបន្ថែមទៀត ចំពោះគ្រោះទឹកជំនន់ដែលបង្កឡើងពីទឹកទន្លេទាំង៣នេះបន្ទាប់ពីមានការហក់ឡើងជាបន្តបន្ទាប់ ក្រោយពីឥទ្ធិពលព្យុះលីនហ្វា (Linfa) និងប្រព័ន្ធវិសម្ពាធទាប (ITCZ) បានធ្វើឱ្យមានភ្លៀងធ្លាក់ខ្លាំងជាច្រើនថ្ងៃជាប់ៗគ្នា បង្កជាជំនន់ទឹកភ្លៀងនៅក្នុងផ្នែកខ្លះនៃតំបន់វាលទំនាបជាប់ផ្លូវទឹក និងក្នុងតំបន់ផ្ទៃរងទឹកភ្លៀងនៃបណ្ដាខេត្តមួយចំនួននៅក្នុងប្រទេសកម្ពុជា៕
អត្ថបទ៖ សំ ជំនាញ, រូបភាព៖ ឯកសារ