ថ្ងៃច័ន្ទ ទី០៦ ខែឧសភា ឆ្នាំ២០២៤
ថ្ងៃច័ន្ទ ទី០៦ ខែឧសភា ឆ្នាំ២០២៤
គណៈកម្មាធិការជាតិអូឡាំឡាពិកកម្ពុជា NOCC បានប្រកាសថា ខ្លួននឹងពិភាក្សាជាមួយសហព័ន្ធកីឡាហែលទឹកអន្តរជាតិ FINA និងគណៈកម្មាធិការជាតិរៀបចំស៊ីហ្គេម២០២៣ CAMSOC ដើម្បីសិក្សា ពិនិត្យ និងវាយតម្លៃអាងហែលទឹក ដែលទើបត្រូវបានបញ្ចប់ការជួសជុលឡើងវិញ ក្នុងតម្លៃជិត ៣លានដុល្លារ ស្ថិតក្នុងពហុកីឡដ្ឋានជាតិអូឡាំពិក ក្នុងគោលដៅត្រៀមដាក់អាងមួយនេះបម្រើការប្រកួតព្រឹត្តិការណ៍កីឡាស៊ីហ្គេមលើកទី៣២ ឆ្នាំ២០២៣ ដែលកម្ពុជាធ្វើម្ចាស់ផ្ទះ។
បើតាមឯកឧត្តម វ៉ាត់ ចំរើន អគ្គលេខាធិការ NOCC បានគូសបញ្ជាក់ថា គម្រោងសិក្សាវាយតម្លៃនេះ ធ្វើឡើងដើម្បីបែងចែកពីកម្រិតនៃការប្រកួត និងប្រភេទវិញ្ញាសានីមួយៗ ថាការប្រកួតវិញ្ញាសាណាខ្លះ ត្រូវធ្វើឡើងនៅអាងហែលទឹកពហុកីឡដ្ឋានមរតកតេជោ ហើយវិញ្ញាសាណាខ្លះ ត្រូវធ្វើឡើងនៅអាងហែលទឹកពហុកីឡដ្ឋានជាតិអូឡាំពិក។
«អាងហែលទឹកពហុកីឡដ្ឋានជាតិអូឡាំពិកនេះ ឃើញថាមានលក្ខណ្ឌល្អប្រសើរមួយ ដែលអាចជាទីតាំងបំពេញបន្ថែម សម្រាប់ទីតាំងដែលមានស្រាប់នៅពហុកីឡដ្ឋានមរតកតេជោ។ ពេលប្រកួតស៊ីហ្គេម យើងអាចនឹងមានការប្រកួតជម្រុះខ្លះ ធ្វើនៅទីនេះ ដើម្បីទាក់ទាញប្រជាជននៅកណ្ដាលទីក្រុងឲ្យចូលទស្សនាដែរ។ អ៊ីចឹងយើងនឹងពិភាក្សាជាមួយ FINA ជាមួយ CAMSOC និងសហព័ន្ធផ្ទាល់ ដើម្បីសម្រេចថា អាចដាក់ឲ្យប្រកួតកម្រិតមួយណា ឬអាចថាលេងវិញ្ញាសាណាខ្លះ ក្នុងចំណោមវិញ្ញាសាទាំងអស់ ព្រោះនៅទីនេះមានគ្រប់បែបតាមស្តង់ដារហើយ»។
គួរបញ្ជាក់ថា បច្ចុប្បន្នកម្ពុជាមានអាងហែលទឹកចំនួន ២ ដែលត្រូវបានសាងសង់ និងជួសជុលរួចរាល់ជាផ្លូវការ ស្រមតាមបទដ្ឋានកំណត់ដោយសហព័ន្ធកីឡាហែលទឹកអន្តរជាតិ ក្នុងនោះអាងហែលទឹកស្ថិតក្នុងពហុកីឡដ្ឋានជាតិអូឡាំពិក និងអាងហែលទឹកស្ថិតក្នុងពហុកីឡដ្ឋានជាតិមរតកតេជោ ក្នុងសង្កាត់ព្រែកតាសេក ខណ្ឌជ្រោយចង្វា ។ អាងទាំង២នេះមានទំហំទទឹង ២៥ម៉ែត្រ និងបណ្តោយ ៥០ម៉ែត្រដូចគ្នា៕
អត្ថបទ និងរូបភាព៖ ងិន មករា
