នៅថ្ងៃនេះ ធនាគារ អេស៊ីលីដា ភីអិលស៊ី បានចុះបញ្ជីលក់សញ្ញាបណ្ណបន្ទាប់បន្សំជាផ្លូវការ នៅផ្សារមូលបត្រកម្ពុជា ក្នុងទំហំទឹកប្រាក់ប្រមាណ ១០០លានដុល្លារអាម៉េរិក។នាពិធីចុះបញ្ជីលក់សញ្ញាបណ្ណបន្ទាប់បន្សំជាផ្លូវការរបស់ធនាគារ អេស៊ីលីដា ភីអិលស៊ី នៅថ្ងៃទី៨ ខែតុលា ឆ្នាំ២០២៥ នៅផ្សារមូលបត្រកម្ពុជា បណ្ឌិត អ៊ិន ចាន់នី ប្រធាននាយកប្រតិបត្តិធនាគារ អេស៊ីលីដា ភីអិលស៊ី បានគូសបញ្ជាក់ថា ការចុះបញ្ជីលក់សញ្ញាបណ្ណបន្ទាប់បន្សំ នៅផ្សារមូលបត្រកម្ពុជា បានកៀរគរទុនប្រមាណ ១០០លានដុល្លារអាម៉េរិក ហើយវាជាលទ្ធផលជោគជ័យ ដែលធនាគារ អេស៊ីលីដា ទទួលបានទំនុកចិត្ត និងការជឿជាក់ពី សំណាក់វិនិយោគិនលើសពីការរំពឹងទុក ហើយការបោះផ្សាយនេះ ក៏បានរួមចំណែកជំរុញកំណើន និងអភិវឌ្ឍន៍ទីផ្សារមូលធននៅកម្ពុជា។

ស្របគ្នានេះ លោក អែម កំណាន់ អគ្គនាយករងត្រួតពិនិត្យ ធនាគារជាតិនៃកម្ពុជា បានមានប្រសាសន៍ដែរថា ការបោះផ្សាយលក់សញ្ញាបណ្ណបន្ទាប់បន្សំរបស់ធនាគារ អេស៊ីលីដា សបញ្ជាក់អំពី ទំនុកចិត្តរបស់ វិនិយោគិន និងសាធារណជន មកលើ វិស័យធនាគារ និងវិស័យមូលបត្ររបស់កម្ពុជា និងជាសារវិជ្ជមានមួយដល់ វិនិយោគិន អំពីស្ថេរភាព ភាពទុកចិត្តបាន និងភាពខ្លាំងផ្នែកបទបញ្ញត្តិ និងការត្រួតពិនិត្យនៃប្រព័ន្ធហិរញ្ញវត្ថុនៅកម្ពុជា។

នាឱកាសនោះ ឯកឧត្តមបណិ្ឌតសភាចារ្យ ហ៊ាន សាហ៊ីប រដ្ឋលេខាធិការនៃក្រសួងសេដ្ឋកិច្ច និងហិរញ្ញវត្ថុ និងជាប្រធានក្រុមប្រឹក្សាភិបាលនៃ ផ្សារមូលបត្រកម្ពុជា បានសម្តែងនូវ ការអបអរសាទរចំពោះ ធនាគារអេស៊ីលីដា ដែលបានបោះផ្សាយលក់សញ្ញាបណ្ណបន្ថែមជាលើកទី ២ ក្នុងឆ្នាំ ២០២៥នេះ និងប្រមូលទុនបន្ថែមជិត ២០០លានដុល្លារអាម៉េរិក សម្រាប់ពង្រឹង និងពង្រីកប្រតិបត្តិការអាជីវកម្ម។

ទន្ទឹមគ្នានេះ ឯកឧត្តម ហុង សុហួរ អគ្គនាយកនៃផ្សារមូលបត្រកម្ពុជា លើកឡើងដែរ ចំពោះការកៀរគរទុននូវទឹកប្រាក់ប្រមាណ ២០០លានដុល្លាររបស់ធនាគារអេស៊ីលីដានេះ គឺបានបង្ហាញឱ្យឃើញកាន់តែច្បាស់អំពី ទំនុកចិត្តរបស់វិនិយោគិន មកលើវិស័យធនាគារ និងវិស័យមូលបត្ររបស់កម្ពុជា ហើយឯកឧត្តម រំពឹងថា ផ្សារមូលបត្រ នឹងក្លាយជាប្រភពទុនមិនចេះរីងស្ងួត ដែលអាចកៀរគរទុនបានរាប់ពាន់លានដុល្លារ នាពេលឆាប់ៗខាងមុខ។

បន្ថែមលើនេះ ឯកឧត្តម ស៊ូ សុជាតិ អគ្គនាយកនៃនិយ័តករមូលបត្រកម្ពុជា បានអបអរសាទរចំពោះ ការបោះផ្សាយលក់សញ្ញាបណ្ណសាជីវកម្មរបស់ធនាគារអេស៊ីលីដា ដែលជាការបោះផ្សាយដ៏ធំមួយនៅកម្ពុជា ក្នុងឆ្នាំ ២០២៥នេះ ហើយឯកឧត្តម ក៏បង្ហាញភាពជឿជាក់ថា ការបោះផ្សាយលក់មូលបត្រសរុបនៅលើផ្សារហ៊ុន នឹងឈានដល់ ៧០០លានដុល្លារអាម៉េរិក ត្រឹមដំណាច់ឆ្នាំ ២០២៥ បន្ទាប់ពីការចូលរួមចំណែកបោះផ្សាយប្រមាណ ២០០លានដុល្លារ របស់ធនាគារ អេស៊ីលីដា។

សូមបញ្ជាក់ថា ក្នុងចំណោមក្រុមហ៊ុនទាំង ២៥ ដែលបានបោះផ្សាយលក់មូលបត្រនៅលើផ្សារហ៊ុន គឺ មានក្រុមហ៊ុនចំនួន ១១ បានបោះផ្សាយលក់មូលបត្រកម្មសិទ្ធិ និងក្រុមហ៊ុនចំនួន ១៤ បានបោះផ្សាយលក់សញ្ញាបណ្ណ ដោយរួមបញ្ចូលទាំងសញ្ញាបណ្ណបៃតង និងសញ្ញាបណ្ណចីរភាព។ គិតត្រឹមត្រីមាសទី ២ ឆ្នាំ២០២៥ ទំហំមូលធនូបនីយកម្មទីផ្សារសរុប មានតម្លៃប្រហែល ២ពាន់ ៧រយលានដុល្លារអាម៉េរិក ឬស្មើនឹង ៥,៧% ធៀបនឹងផលិតផលក្នុងស្រុកសរុប។ ចំពោះទំហំជួញដូរប្រចាំថ្ងៃជាមធ្យម មានជាង ៧ម៉ឺនភាគហ៊ុន ខណៈតម្លៃជួញដូរប្រចាំថ្ងៃជាមធ្យមប្រមាណ ១៣ម៉ឺនដុល្លារអាម៉េរិក៕
 

អត្ថបទ៖ ងួន សុភ័ត្រ្តា រូបភាព៖ អ៊ិន អាត