ហ្វេសប៊ុកផ្លូវការរបស់ឯកឧត្តមបណ្ឌិតសភាចារ្យ ហង់ ជួនណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងយុវជន និងកីឡា បានបង្ហោះ នៅរសៀលថ្ងៃទី២៧ ខែកក្កដា ឆ្នាំ២០២៥ ម្សិលមិញនេះថា ការប្រឡងសញ្ញាបត្រមធ្យមសិក្សាទុតិយភូមិ ឬការប្រឡងបាក់ឌុប ដែលគ្រោងនឹងធ្វើនៅថ្ងៃទី១៨-១៩ សីហា ត្រូវពន្យារពេលទៅធ្វើនៅថ្ងៃទី២៨-២៩ សីហា វិញ។

ពិតជាគាប់ជួនគ្នាណាស់ មុននោះប្រមាណជា ១៥ នាទីប៉ុណ្ណោះ PNN បានសួរថា តើក្រសួងអប់រំមានដំណោះស្រាយយ៉ាងណាចំពោះសិស្សដែលត្រូវប្រឡងបាក់ឌុប ឆ្នាំ២០២៥ ហើយគឺជាសិស្សដែលរងផលប៉ះពាល់ពីសង្គ្រាមឈ្លានពានរបស់កងទ័ពថៃ មកលើកម្ពុជា នោះ លោកជំទាវ ឃួន វិច្ឆិកា អ្នកនាំពាក្យក្រសួងអប់រំយុវជ និងកីឡា បានឆ្លើយជាសំឡេងយ៉ាងដូច្នេះថា ។

សូមជម្រាបជូនថា ដោយសារសង្គ្រាមឈ្លានពានរបស់កងទ័ពថៃ មើលទឹកដីកម្ពុជា ចាប់ពីថ្ងៃទី២៤ ខែកក្កដា ឆ្នាំ២០២៥ មក គិតត្រឹមល្ងាចថ្ងៃទី២៨ ខែកក្កដា ឆ្នាំ២០២៥ នេះ សាលារៀនសរុបជាង ៦០០ ត្រូវបានបិទទ្វារទាំងស្រុង ដោយមានសិស្សានុសិស្ស ទាំងកម្រិតមត្តេយ្យ បឋម និងមធ្យមសិក្សា សរុបប្រមាណជា ១ ម៉ឺននាក់ ដែលអ្នកខ្លះបានក្លាយជាជនភៀសសឹក រត់ចោលផ្ទះសម្បែងជាមួយគ្រួសារ ខណៈអ្នកខ្លះទៀត បើទោះបីជាគ្រួសារមិនទាន់ត្រូវបានជម្លៀសចេញពីភូមិឋាន ក៏មិនអាចទៅសាលាបានដែរ ដ្បិតសាលារៀនត្រូវបានបិទទ្វារ ដោយសារបារម្ភអំពីសុវត្ថិភាព ពោលគឺពួកគេត្រូវដាច់ការសិក្សាទាំងស្រុង នៅក្នុងខេត្តចំនួន ៧ គឺខេត្តកោះកុង ពោធិ៍សាត់ បាត់ដំបង ប៉ៃលិន បន្ទាយមានជ័យ ឧត្តរមានជ័យ និងខេត្តព្រះវិហារ។ 

ពុំមាននរណាម្នាក់អាចដឹងបាននៅឡើយទេថា តើដល់ពេលណាទើបសិស្សានុសិស្សទាំងនោះនឹងអាចត្រលប់ចូលសាលារបស់ពួកគេវិញបានទេ ។ ដ្បិតថាបើទោះបីជាសម្ដេចមហាបវរធិបតី ហ៊ុន ម៉ាណែត នាយករដ្ឋមន្រ្តី នៃព្រះរាជាណាចក្រកម្ពុជា និងនាយករដ្ឋមន្ត្រីស្តីទីថៃ បានព្រមព្រៀងគ្នាទទួលយកការឈប់បាញ់តាមការសម្របសម្រួលរបស់លោក ដូណាល់ ត្រាំ ប្រធានាធិបតីអាម៉េរិក កាលពីរាត្រីថ្ងៃទី២៧ ហើយនៅថ្ងៃទី២៨ ខែកក្កដា នេះ មានកិច្ចប្រជុំរវាងកម្ពុជា និងថៃ នៅប្រទេសម៉ាឡេស៊ី ក្នុងឋានៈជាប្រធានប្ដូរវេនអាស៊ាន ក្រោមកិច្ចសហការរៀបចំដោយរដ្ឋមន្ត្រីការបរទេសអាម៉េរិក និងមានការចូលរួមពីមហាអំណាចចិន ក៏ដោយ ក៏នៅក្នុងសន្និសីទសារព័ត៌មាន នៅម៉ោង ៧  ព្រឹកថ្ងៃទី២៨ ខែកក្កដា នេះ លោកជំទាវឧត្តមសេនីយ៍ឯក ម៉ាលី សុជាតា អ្នកនាំពាក្យក្រសួងការពារជាតិ បានលើកឡើងថា កងទ័ពថៃ នៅតែបន្តវាយសន្ធាប់មកលើកងទ័ពកម្ពុជា កាន់តែធ្ងន់ធ្ងរ កាន់តែកាចសាហាវ កាន់តែឃោរឃៅ កាន់តែរីករាលដាល ហើយប្រើអាវុធកាន់តែពិសពុលរួមទាំងការប្រើយន្តហោះចម្បាំង ដ្រូនអត្តឃាត ផ្សែងពុល និងគ្រាប់បែកចង្កោម ដែលត្រូវពិពភពហាមឃាត់ផងដែរ។

ដូច្នេះសូម្បីតែការប្រឡងសញ្ញាបត្រមធ្យមសិក្សាទុតិយភូមិ ឬបាក់ឌុប ដែលត្រូវបានប្ដូរទៅធ្វើនៅថ្ងៃទី២៨-២៩ ខែសីហា នោះទៀតសោត ក៏គ្មាននរណាម្នាក់អាចប្រាកដថាធ្វើបាន ឬក៏យ៉ាងណាឡើយផងទេ៕

អត្ថបទ៖ ខឿន សាឃាង  រូបភាព៖ ឯកសារ