ប្រទេសចិន នៅថ្ងៃអង្គារ បានប្រកាសពីជោគជ័យនៃការបាញ់បង្ហោះយានដឹកទំនិញ Tianzhou-9។ យាននេះ ដឹកជញ្ជូនសំភារៈទៅកាន់ស្ថានីយ៍អវកាសTiangong ។ 

រ៉ុកកែត Long March-7 Y10 បានបាញ់បញ្ជូនយានTianzhou-9 ចេញពីទីតាំងបាញ់បង្ហោះយានអវកាសWenchangនៅវេលាម៉ោង៥និង៣៤នាទី ខេត្តHainan ប្រទេសចិន។ យោងទីភ្នាក់ងារអវកាសរបស់ប្រទេសចិន China Manned Space Agency។ ប្រហែល១០នាទីក្រោយ ការបាញ់បង្ហោះ យានTianzhou-9 បានបំបែកចេញពីរ៉ុកកែត ហើយចូលទៅក្នុងគន្លងតារាវិថីដូចដែលបានកំណត់ទុក។ 

លោកGuo Zhonglai មេបញ្ជាការបាញ់បង្ហោះរ៉ុកកែត បានប្រកាសដូច្នេះ«ឥឡូវនេះ ខ្ញុំសូមប្រកាសថា ការបាញ់បង្ហោះទទួលបានជោគជ័យទាំងស្រុង»។

អវកាសយាននិក នៃបេសកកម្មយានShenzhou-20 ដែលបានទៅដល់ស្ថានីយ៍អវកាសថ្ងៃ២៤មេសា នឹងចូលទៅក្នុងយានដឹកទំនិញ ហើយផ្ទេរបរិក្ខារនៅលើយានទៅតាមពេលវេលាគ្រោងទុក។ 

យាន Tianzhou-9 ដឹកបរិក្ខារប្រហែល៦,៥តោន ទៅស្ថានីយ៍អវកាសរួមមានសម្ភារៈទ្រទ្រង់ជីវិតសម្រាប់អវកាសយាននិកនៃបេសកកម្មយានShenzhou-20 និងយាន Shenzhou-21, សម្លៀកបំពាក់សម្រាប់អវកាសយាននិក២ឈុត, ឧបករណ៍ហាត់ប្រាណ,រួមនិងសំភារៈផ្សេងៗទៀត។ 

ប្រែសម្រួល៖ណាវ័ន្ត