ការនាំចេញត្រីប្រារបស់វៀតណាម រំពឹងនឹងសម្រេចបាន ២ពាន់លានដុល្លារអាមេរិក ក្នុងឆ្នាំ ២០២៤នេះ ដោយសារតែការប្រកួតប្រជែងកាន់តែខ្លាំង នៅក្នុងទីផ្សារពិភពលោក។ នេះបើតាមការចេញផ្សាយដោយ សារព័ត៌មានក្នុងស្រុកវៀតណាម នៅថ្ងៃនេះ។

សមាគមអ្នកនាំចេញ និងផលិតអាហារសមុទ្រវៀតណាម បានឱ្យដឹងថា ការនាំចេញត្រីប្រា នៅឆ្នាំនេះ ទំនងជានឹងឈានដល់តម្លៃ ២ពាន់លានដុល្លារអាមេរិក។
ជាក់ស្តែង ការនាំចេញនៅក្នុងរយៈពេល ១១ខែ ឆ្នាំ ២០២៤ មានចំនួនសរុប ១,៨ពាន់លានដុល្លារអាមេរិក ពោលគឺកើនឡើង ១០% ធៀបនឹងពេលដូចគ្នា កាលពីឆ្នាំមុន។

ប្រទេសចិន នៅតែជាទីផ្សារនាំចេញធំបំផុតសម្រាប់ ត្រីប្រារបស់វៀតណាម ដោយបានកើនឡើងលើសពី ៥០០លានដុល្លារអាមេរិក សម្រាប់រយៈពេល ១១ខែ។
សហរដ្ឋអាមេរិក ជាប់ចំណាត់ថ្នាក់ជាទីផ្សារធំទី ២ មានចំនួនទឹកប្រាក់សរុបជាង ៣១៧លានដុល្លារអាមេរិក ពោលគឺកើនឡើង ២៦%។ដោយឡែក សហភាពអឺរ៉ុប គឺជាទីផ្សារត្រីធំទី ៤ របស់វៀតណាម ដោយមានទំហំជាង ១៦០លានដុល្លារ កើនឡើង ៣%។

សូមជម្រាបថា សមាគមអ្នកនាំចេញ និងផលិតអាហារសមុទ្រវៀតណាម អះអាងថា ការនាំចេញត្រីប្រារបស់វៀតណាម កំពុងដើរលើផ្លូវ ដើម្បីឈានដល់ការព្យាករណ៍គោលដៅ ២ពាន់លានដុល្លារ នៅឆ្នាំ ២០២៤ ដោយមានភាពទាក់ទាញ ការប្រកួតប្រជែង និងសក្តានុពលក្នុងទីផ្សារពិភពលោក៕

អត្ថបទ៖ ងួន សុភ័ត្រ្តា រូបភាព៖ ឯកសារ