ស័ក្កិសមជាក្រុមរាំ K-POP ដ៏ល្បី ទោះរវល់ប៉ុណ្ណាក៏ក្រុមរាំល្បីឈ្មោះ OMG ឆ្លៀតរៀបចំកម្មវិធីដ៏គួរឱ្យភ្ញាក់ផ្អើលមួយជាកាដូចុងឆ្នាំសម្រាប់អ្នកគាំទ្ររបស់ពួកគេ នៅថ្ងៃទី៣១ ខែធ្នូ ខាងមុខនេះ។

ព្រឹត្តិការណ៍ និងកម្មវិធីសប្បាយៗជាច្រើនត្រូវបានរៀបចំឡើងជាហូរហែរ ដើម្បីអបអរសាទរថ្ងៃឆ្លងឆ្នាំសកល២០២៥ ដែលនឹងឈានមកដល់នាប៉ុន្មានថ្ងៃខាងមុខនេះ។ មិនដែលឱ្យទស្សនិកជន និងអ្នកគាំទ្រខកបំណងម្តងណាឡើយ ក្រុមរាំស្រីល្បីឈ្មោះ OMG កំពុងត្រៀមកម្មវិធីដ៏គួរឱ្យភ្ញាក់ផ្អើលមួយទុកជាកាដូចុងឆ្នាំសម្រាប់អ្នកគាំទ្ររបស់ពួកគេ។

តាមការបង្ហើបពី ដាណែត មេក្រុម OMG ឱ្យដឹងថា ក្រុម OMG បានត្រៀមបទចម្រៀង Original song និងក្បាច់រាំពិសេសៗជាច្រើនសម្រាប់អ្នកគាំទ្រ រួមទាំងការតុបតែងខ្លួនប្លែកៗដើម្បីរឹតតែទាក់ទាញ និងមានភាពរស់រវើកខ្លាំងឡើង។

ដោយសារកម្មវិធីបើកឱ្យទស្សនិកជនចូលរួមដោយស៊េរី ដូច្នេះកុំភ្លេចទៅលេងកម្សាន្តឱ្យបានច្រើនកុះករ នៅខាងមុខព្រះបរមរាជវាំង ថ្ងៃទី៣១ ខែធ្នូ ខាងមុខ ដើម្បីទទួលយកភាពសប្បាយរីករាយជាមួយគ្នា។

សម្រាប់ឆ្នាំថ្មី២០២៥ ខាងមុខ ក្រុមរាំ OMG មានគម្រោងការងារថ្មីៗជាច្រើនដែលត្រៀមបង្ហាញជូនទស្សនិកជន ប៉ុន្តែពេលនេះនៅមិនទាន់អាចទម្លាយឱ្យដឹងនៅឡើយ ព្រោះចង់ឱ្យអ្នកគាំទ្ររំភើបចិត្ត។ កុំភ្លេចរង់ចាំអ៊ុតមើលទាំងអស់គ្នា OMG មិនធ្វើឱ្យអ្នកគាំទ្រខកបំណងឡើយ ពិសេសការរាំចង្វាក់ K-POP ដ៏រស់រវើក៕

អត្ថបទ៖ រ៉ាត់ ចាន់ធីតា រូបភាព៖ ឃាង ទូច