គិតត្រឹមថ្ងៃទី៣ ខែធ្នូ ឆ្នាំ២០២៤ នេះ នៅសល់ពេល ១០ថ្ងៃទៀត សម្រាប់បេក្ខជន ដែលត្រូវការអាហារូបករណ៍ថ្នាក់បរិញ្ញាបត្រ នៅវិទ្យាស្ថានជាតិសង្គមកិច្ច។ វិទ្យាស្ថានជាតិសង្គមកិច្ច ផ្តល់អាហារូបករណ៍ រៀនដោយមិនបង់ថ្លៃ ថ្នាក់បរិញ្ញាបត្រ ចំនួន ៣៣០កន្លែង។ ហេតុនេះ អ្នកដែលមានសញ្ញាបត្របាក់ឌុប ឬទើបតែបានប្រឡងជាប់បាក់ឌុប សុទ្ធតែអាចដាក់ពាក្យប្រឡង យកអាហារូបករណ៍នេះ។

អាហារូបករណ៍ថ្នាក់បរិញ្ញាបត្រចំនួន ៣៣០ កន្លែង របស់ វិទ្យាជាតិសង្គមកិច្ច សម្រាប់បេក្ខជនដែលមានសញ្ញាបត្រមធ្យមសិក្សាទុតិយភូមិ ឬបាក់ឌុប ឬ សម្រាប់អ្នកដែលទើបតែបានប្រឡងជាប់ឌុប បើទោះបីជាពុំទាន់មានសញ្ញាបត្រក៏អាចដាក់ពាក្យប្រឡងយកអាហារូបករណ៍នេះបានដែរ ហើយកាលបរិច្ឆេទ នៃការឈប់ទទួលពាក្យគឺនៅថ្ងៃទី១៣ ខែធ្នូ   ឆ្នាំ២០២៤ ។

 ដូច្នេះបេក្ខជនដែលមានចំណាប់អារម្មណ៍ ជាពិសេសបេក្ខជន នៃគ្រួសារក្រីក្រ មកពីជនបទជាដើម សូមរូតរះបំពេញ និងដាក្យពាក្យចាប់យកឱកាសដ៏មានតម្លៃនេះឱ្យបានទាន់ពេលវេលា ។ នេះគឺជាការលើកឡើងរបស់ឯកឧត្តម សរ បូរីរក្ស នាយកវិទ្យាស្ថានជាតិសង្គមកិច្ច នាឱកាសផ្ដល់បទសម្ភាសន៍ផ្ដាច់មុខដល់ PNN នាថ្ងៃទី៣ ខែធ្នូ ឆ្នាំ២០២៤ នេះ ។

សូមជម្រាបជូនថា អាហារូបករណ៍ដែលត្រូវបានផ្ដល់ជូននៅពេលនេះមានចំនួន ៩ ឯកទេសគឺ ទី១.សង្គមវិជ្ជា,ទី២.សង្គមកិច្ចវិជ្ជា,ទី៣.កិច្ចគាំពារសង្គម,ទី៤.គោលនយោបាយសង្គម,ទី៥.គោលនយោបាយសាធារណៈ,ទី៦.រដ្ឋបាលសាធារណៈ ,ទី៧.គ្រប់គ្រងសាធារណៈ ,ទី៨.អក្សរសាស្ត្រ ភាសាអង់គ្លេស និងទី៩.វិស្វកម្មឧបករណ៍សិប្បនិម្មិត និងរណប ។

បេក្ខជន អាចទៅរកពាក្យនៅឯវិទ្យាស្ថានជាតិសង្គមកិច្ច ដែលស្ថិតនៅតាមវិថីដួងងៀប ដោយផ្ទាល់ក៏បាន នៅរៀងម៉ោងធ្វើការ ចាប់ពីថ្ងៃចន្ទ ដល់ថ្ងៃសៅរ៍ ឬអាចទាញយកពាក្យតាមផេចរបស់វិទ្យាស្ថានជាតិសង្គមកិច្ចក៏បាន ។គួរជម្រាបជូនថា សម្រាប់ប្រទេសជឿនលឿន មានអ្នកបម្រើការងារផ្នែកសេវាសង្គមម្នាក់ សម្រាប់មនុស្សប្រមាណជា ៥០០ ទៅ ១ ០០០ នាក់ ។ចំណែកបណ្ដាប្រទេសក្នុងតំបន់ មានអ្នកបម្រើសេវាសង្គមម្នាក់សម្រាប់មនុស្សប្រមាណជា ៣ ៥០០ នាក់ ។

ដោយឡែកនៅកម្ពុជា ទើបតែមានអ្នកបម្រើសេវាសង្គមម្នាក់ប៉ុណ្ណោះ សម្រាប់មនុស្សប្រមាណជា ១ ម៉ឺន ២ ពាន់នាក់ ពោលគឺកម្ពុជា កំពុងនៅត្រូវការធនធានមនុស្សផ្នែកសេវាសង្គមនេះច្រើននាក់ថែមទៀត ឬក៏អាចនិយាយម្យ៉ាងទៀតថា ចំពោះអ្នកដែលប្រឡងជាប់ចូលសិក្សានៅវិទ្យាស្ថានជាតិសង្គមកិច្ច និងបានរៀនជាប់ដោយជោគជ័យនោះ ពួកគេនឹងមានឱកាសការងារច្រើន ទាំងក្នុងស្ថាប័នរដ្ឋាភិបាល និងមិនមែនរដ្ឋាភិបាលជាតិ និងអន្តរជាតិ ៕

អត្ថបទ៖ ខឿន សាឃាង រូបភាព៖ សែត ប៊ុនថាន់