ហ្វីលីពីនត្រៀមនៅថ្ងៃអង្គារ(១២វិច្ឆិកា) ដើម្បីជម្លៀសមនុស្សរាប់ម៉ឺននាក់ ខណៈព្យុះកម្លាំងខ្លាំងទី៥ក្នុងពេលត្រឹមតែ៣សប្តាហ៍នឹងបោកបក់លើប្រទេសហ្វីលីពីន ក្រោយការវាយប្រហារយ៉ាងខ្លាំងពីព្យុះទីហ្វុងToraji។

ឥឡូវព្យុះToraji ដែលបានថមថយកម្លាំងចុះជាព្យុះត្រូពិច បានបក់ចេញទៅសមុទ្រ ក្រោយបំផ្លិចបំផ្លាញហ្វីលីពីន ប៉ុន្តែមិនមានការរាយការណ៍ពីមនុស្សស្លាប់។ 

ប៉ុន្តែឥឡូវ ព្យុះUsagi នឹងបោកបក់លើឆ្នេរកោះLuzon ក្នុងពេលត្រឹមតែ២ថ្ងៃទៀតប៉ុណ្ណោះ។ កោះLuzonជាកោះធំបំផុតរបស់ប្រទេសហ្វីលីពីន និងជាកោះដែលមានមនុស្សរស់នៅច្រើនបំផុត។ 

អាជ្ញាធរហ្វីលីពីន ឱ្យដឹងថា «ឥឡូវនេះ កំពុងតែតាមដានដំណើរបោកបក់របស់ព្យុះUsagi»។ «យើងជម្លៀសមនុស្ស៤០,០០០នាក់ ដូច្នេះ យើងនឹងអង្កេតតាមដានដំណើរព្យុះត្រៀមជម្លៀសមនុស្សបន្ថែមទៀតដែលកិច្ចការនេះនឹងសម្រេចក្នុងកិច្ចប្រជុំថ្ងៃពុធ»។

ប្រែសម្រួល៖ណាវ័ន្ត