អ្នកចាត់ការជោគជ័យបំផុតរបស់ Manchester United លោក Alex Ferguson នឹងលាលែងពីតំណែងជាឯកអគ្គរដ្ឋទូតរបស់ក្លឹប បន្ទាប់ពីម្ចាស់ភាគហ៊ុនរបស់ក្លឹប INEOS បានបញ្ចប់កិច្ចសន្យា របស់លោក។

លោក Sir Alex Ferguson ដែលធ្លាប់ជាផ្នែកសំខាន់របស់ក្លឹបបិសាចក្រហម អស់ជាច្រើនឆ្នាំនោះបានចុះកិច្ចព្រមព្រៀងជាមួយ Man United ក្នុងឆ្នាំ 2013 ដើម្បីធ្វើជាឯកអគ្គរាជទូតក្លឹបដោយទទួលបាន 2.16 លានផោន (2.82 លានដុល្លារ) ក្នុងមួយឆ្នាំ។

យ៉ាងណាមិញពេលនេះក្លឹបមានការកាត់បន្ថយចំណាយនៅក្នុងក្លឹបដោយក្រុមប្រឹក្សាភិបាលនៅ Man United ដែលត្រូវធ្វើការសន្សំការចំណាយនៅក្លឹប ដែលបណ្តាលឱ្យមានការខាតបង់អស់មួយរយៈពេលក្លឹបធ្លាក់ទម្រង់។

លោក Ferguson ដែលនឹងលាលែងពីតំណែងជាឯកអគ្គរដ្ឋទូតនៅដំណាច់រដូវកាលនេះ បានដឹកនាំ Man United ឈ្នះពានរង្វាន់ចំនួន 38 រួមទាំងពានរង្វាន់ Premier League ចំនួន 13 និងពានរង្វាន់ Champions League ចំនួនពីរ មុនពេលលោកចូលនិវត្តន៍ពីការគ្រប់គ្រង នៅឆ្នាំ ២០១៣។

សូមបញ្ចាក់ថា Man United បច្ចុប្បន្នកំពុងស្ថិតក្នុងចំណាត់ថ្នាក់លេខ 14 បន្ទាប់ពីបានបញ្ចប់ក្នុងចំណាត់ថ្នាក់លេខ 8 ដ៏អាក្រក់បំផុតមិនធ្លាប់មាននៅក្នុងក្របខ័ណ្ឌ Premier League កាលពីរដូវកាលមុន បើទោះបីជាចំណាយ ជាង 200 លានផោនលើការនាំយកកីឡាករមកចូលរួមនារដូវកាលមុនក៏ពិតមែន ខណៈពួកគេបានចំណាយប្រហែល 600 លានផោនលើកីឡាករ ចាប់តាំងពីអ្នកចាត់ការសញ្ជាតិហូឡង់ Erik ten Hag ចូលរួម ក្រោមការដឹកនាំរបស់លោកនៅ រដូវកាល 2022-23 ។