អ្នកលេងកណ្តាប់ដៃភ្លើង ជើងរន្ទះ រឿង សោភ័ណ្ឌ នឹងត្រូវជួបតតាំងជាមួយដៃគូចាស់ ដែលធ្លាប់ប៉ះគ្នាច្រើនលើក គឺកីឡាករថៃ ផ្លាំងនុម ប៉.យុទ្ធភូមិ ស.ថាណាផេត នៅក្នុងកម្មវិធីប្រដាល់ «Ganzberg One Strike» នៅថ្ងៃ អាទិត្យ ទី ១៩ ខែកុម្ភៈ ឆ្នាំ ២០២៣ សប្តាហន៍នេះ នាសង្វៀន PNN ។

កីឡាកររឿង សោភ័ណ្ឌ ដែលបច្ចុប្បន្ន កំពុងហ្វឹកហាត់ក្នុងជំរុំប្រមូលផ្តុំជម្រើសជាតិ Kick Boxing នាពហុកីឡដ្ឋានស្តាតចាស់ បានប្រាប់មកកាន់ក្រុមការងារ PNN Sports យ៉ាងដូច្នេះថា ចំពោះការជួបដៃគូចាស់នាសប្តាហ៍នេះ រូបគេមិនមានក្តីបារម្មណ៍ច្រើននោះទេ ដោយសារប៉ះគ្នាច្រើនលើក ទទួលបានជ័យជំនះ ច្រើនជាងចាញ់ ។

បើទោះឈ្នះច្រើនជាងចាស់ក៏ពិតមែន តែរឿងសោភ័ណ្ឌ បញ្ជាក់ថា នឹងត្រៀមប្តូយុទ្ធសាស្ត្រប្រកួតជាមួយដៃគូចាស់រូបនេះ ដោយកីឡាករគេល្អកែងធ្លាប់ធ្វើអោយខ្លួន បាក់ក្តោងច្រមុះពេលប៉ះគ្នាលើកចុងក្រោយម្តងរួមមកហើយ ។

សូមជម្រាបថា រឿង សោភ័ណ្ឌ នឹងត្រូវជួបកីឡាករថៃ ផ្លាំងនុម ប៉.យុទ្ធភូមិ ស.ថាណាផេត ចំណែក កាន់ ម៉េងហុង ត្រូវជួប ណុកក្រាក់ជីប ស៊ីត.ផ.អ៊ែត ប្រកួតលក្ខណៈ One Strike ហ្គង់ចេញម្រាម រីឯគូមិត្តភាពជាតិ ផ្សេងទៀតមានដូចជា កីឡាករនេត្រ ពិឈីង ប៉ះ រឿង ចិត្រា , កីឡាករខុន សីហា ប៉ះកំពែង ខ្មៅ និងណង សាវ ប៉ះ ម៉ិល សារុន នៅក្នុងកម្មវិធីប្រដាល់«Ganzberg One Strike» ផ្សាយផ្ទាល់រៀងរាល់ថ្ងៃ អាទិត្យ ចាប់ពីវេលាម៉ោង ១ រសៀលតទៅ នៅលើកញ្ចក់ទូរទស្សន៍ ភីអិនអិន ។

អត្ថបទ និងរូបភាព៖ សារ៉ាន ទីងី