បើទោះបីជាអតីតតារាចម្រៀង ម៉ូលីកា បានបោះបង់អាជីពចម្រៀងអស់ជាច្រើនឆ្នាំ តែនាងនៅតែលេចមុខខ្លាំងក្នុងពិភពអនឡាញ។ ជាពិសេសនាងតែងតែលេចមុខនៅក្នុងកម្មវិធីសប្បុរធម៌ជាច្រើន ជាក់ស្តែងកាលពីថ្ងៃទី ១៤ ខែ តុលាកន្លងមកនេះ នាងនិងស្វាមីព្រមទាំងបងប្រុសធម៌ បានចែកអំណោយដល់តាស៊ីក្លូ និងពលរដ្ឋក្រីក្រជាង ៥០០ នាក់ នៅក្បែរវត្តឧណ្ណាលោមក្នុងនោះមានទាំងថវិកា និងអាហារមួយចំនួន ។

នៅក្នុងថ្ងៃចែកអំណោយដល់តាស៊ីក្លូ និងពលរដ្ឋក្រីក្រ យើងចាប់អារម្មណ៍ឃើញថា មានសិល្បករមួយចំនួនក៏បានចូលរួមជាមួយ ម៉ូលីកា និង ស្វាមីនាងផដែរ ដោយម្នាក់ៗមានទឹកមុខរីករាយដែលបានធ្វើកម្មវិធីសប្បុរសធម៌រួមគ្នា ។ អតីតតារាចម្រៀង ម៉ូលីកា ដែលបច្ចុប្បន្នជាថៅកែក្រុមហ៊ុន NK Molika Beauty បានឱ្យដឹងថា នាងពិតជារីករាយណាស់ដែលបានចែកអំណោយដល់តាស៊ីក្លូជាថ្មីម្តងទៀត ជាមួយបងប្រុសធម៌ខ្លួន ដោយឆ្នាំនេះការចែកអំណោយគឺមានលក្ខណៈធំជាងមុន ។

ថ្វីត្បិតតែ ម៉ូលីកា បានបោះបង់អាជីពចម្រៀងអស់ជាច្រើនឆ្នាំ ប៉ុន្តែនាងលេចមុខខ្លាំងនៅក្នុងវិស័យអនឡាញ បច្ចុប្បន្ននាងមានអាជីវកម្មជាច្រើននៅក្នុងដៃ បើប្រៀបធៀបទៅនឹងប៉ុន្មានឆ្នាំមុនពិតជាខុសគ្នាឆ្ងាយណាស់ ។ ម៉ូលីកា បានប្រាប់ទៀតថា ឆាប់ៗខាងមុខ នាងត្រៀមនឹងធ្វើបទចម្រៀងផ្ទាល់ខ្លួនដើម្បីបង្ហាញអ្នកគាំទ្រ នាងរំពឹងថាទស្សនិកជននៅតែស្រឡាញ់និងគាំទ្រសម្លេងនាង ។

ម៉ូលីកា ក៏មានគម្រោងនឹងចែកអំណោយជាបន្តបន្ទាប់ទៀតដល់ពលរដ្ឋក្រីក្រ ទៅតាមលទ្ធភាពដែលខ្លួនមាន ពីព្រោះរាល់ពេលដែលនាងធ្វើកម្មវិធីសប្បុរសធម៌ម្តងៗធ្វើឱ្យចិត្តនាងសប្បាយរីករាយ ។  បច្ចប្បន្ន ម៉ូលីកា មានផ្ទះវិឡាជាច្រើនខ្នង នាងថែមទាំងមានរថយន្តទំនើបៗជាច្រើនគ្រឿងដូចជារថយន្ត Escalade , Ford Raptor , Jaguar និងរថយន្ត Range Rover   ជីវិតនាងមិនលំបាកដូចពេលមុនទៀតទេ នាងខំប្រឹងពង្រើងអាជីវកម្ម ខ្លួនឱ្យកាន់តែធំឡើងៗ ពីព្រោះនាងមិនចង់ជួបរឿងលំបាកដូចមុន ៕

អត្ថបទ ៖ ម៉ា រីសា រូបភាព ៖ ហ៊ុន សុជាតា