ព្រះមហាក្សត្រី Elizabeth (អេលីហ្សាប៊េត) ដែលជាស្ដេចនៃចក្រភពអង់គ្លេស និងនៅរាជបុរីចំនួន១៤ផ្សេងទៀតនោះ បានសោយទិវង្គត នៅរសៀលថ្ងៃព្រហស្បត្តិ៍ ក្នុងព្រះជន្ម ៩៦ព្រះវស្សា។ 

ព្រះមហាក្សត្រី Elizabeth (អេលីហ្សាប៊េត) ដែលជាស្ដេចគ្រងរាជ្យយូរឆ្នាំជាងគេរបស់ចក្រភពអង់គ្លេស បានសោយទិវង្គតនៅក្នុងព្រះជន្ម ៩៦ព្រះវស្សា។ នេះបើតាមការប្រកាសរបស់រាជវាំង Buckingham (បាកឃីងហេម) កាលពីអាធ្រាត្រថ្ងៃព្រហស្បត្តិ៍។

ក្នុងសេចក្ដីប្រកាសរបស់រាជវាំង Buckingham (បាកឃីងហេម) បានសរសេរថា ៖ "ព្រះមហាក្សត្រីបានសោយទិវង្គតដោយស្ងប់សុខនៅវិមាន Balmoral (បាលមូរ៉ាល) នាពេលរសៀលនេះ"។

ក្រោយការសោយទិវង្គតនេះ បុត្រច្បងរបស់មហាក្សត្រី Elizabeth (អេលីហ្សាប៊េត) គឺព្រះអង្គម្ចាស់ Charles (ឆាលស៍) ដែលមានព្រះជន្ម ៧៣ព្រះវស្សា នឹងក្លាយជាស្ដេចនៃចក្រភពអង់គ្លេស និងនៅរាជបុរីចំនួន១៤ផ្សេងទៀត រួមមានប្រទេសអូស្ត្រាលី, ប្រទេសកាណាដា និងប្រទេសនូវែលហ្សឺឡង់ជាដើម។

ព្រះមហាក្សត្រី Elizabeth (អេលីហ្សាប៊េត) មានបញ្ហាព្រះសុខភាពចាប់តាំងពីចុងឆ្នាំ២០២១មកម្ល៉េះ ដោយរាជវាំង Buckingham (បាកឃីងហេម) បានហៅជំងឺរបស់ទ្រង់ថា "ជំងឺពិបាកបម្លាស់ទី" ដែលជំងឺនេះបានបង្ខំឲ្យទ្រង់ត្រូវដកព្រះកាយចេញពីការងារសាធារណៈទាំងអស់។ 

ព្រះមហាក្សត្រី Elizabeth (អេលីហ្សាប៊េត) បានឡើងគ្រងរាជ្យបន្ទាប់ពីការសោយទិវង្គតនៃព្រះបិតារបស់ទ្រង់ គឺនៅថ្ងៃទី២ ខែមិថុនា ឆ្នាំ១៩៥៣ ពេលដែលទ្រង់ទើបមានព្រះជន្ម ២៥ព្រះវស្សាប៉ុណ្ណោះ។ ទ្រង់បានក្លាយជាស្ដេចដែលគ្រងរាជ្យយូរឆ្នាំជាងគេក្នុងប្រវត្តិសាស្ត្ររបស់ចក្រភពអង់គ្លេស និងយូរជាងគេបំផុតលើលោក៕ 
 

ប្រែសម្រួល៖ វ៉ាន់ថន