ដើម្បីជាការទាក់ទាញអតិថិជន និងកាត់បន្ថយការប្រើប្រាស់ប្លាស្ទិកនៅកម្ពុជា លោក បឿន ចំរើន ស្ថាបនិកបាយវត្ត និងជាម្ចាស់ហាងកាហ្វេ Frank Coffee នៅរាជធានីភ្នំពេញ បានប្រើប្រាស់ស្លឹកឈូក វេចខ្ចប់ម្ហូបអាហារ ជូនអតិថិជន ជំនួសប្រើប្រាស់ប្លាស្ទិក។ ការប្រើប្រាស់ស្លឹកឈូក សម្រាប់វេចខ្ចប់ម្ហូបអាហារនេះ ក៏បានទាក់ទាញអតិថិជនផងដែរ។

ផ្ដើមចេញពីអាជីវកម្មកាហ្វេតូចមួយ លោក បឿន ចំរើន បានក្លាយជាស្ថាបនិក Frank Coffee  និងបាយវត្តមួយកន្លែង ដែលស្ថិតនៅក្នុងវត្តស្វាយពពែ និងពុទ្ធិកសកលវិទ្យាល័យព្រះសីហមុនីរាជានៃរាជធានីភ្នំពេញ។ ក្នុងវ័យ ៤១ឆ្នាំ  លោក បឿន ចំរើន បានឱ្យទូរទស្សន៍ PNN ដឹងថា រយៈពេលជាង ៦ឆ្នាំមកនេះ លោកបានចូលរួមចំណែកមួយដ៏សំខាន់ ក្នុងការកាត់បន្ថយការប្រើប្រាស់ប្លាស្ទិកនៅកម្ពុជាតាមរយៈការប្រើប្រាស់ស្លឹកឈូកខ្ចប់ម្ហូបអាហារជូនអតិថិជន ។

លោក បឿន ចំរើន ៖« ដូច្នេះដើម្បីសន្សំពេលវេលាយើង ក៏បានសម្រេចចិត្តរៀបចំជាបាយឡើង ដើម្បីសន្សំពេល និងបំពេញតម្រូវការបស់ពួកគាត់  ចឹងយើងចាប់ ផ្ដើមធ្វើបាយ ក៏ប៉ុន្ដែកាលនោះ យើងបានរៀបចំលក់បាយនឹងគឺ ជាលក្ខណៈតូចតាចនៅឡើយទេ មានន័យថា ពេលនឹងយើងធ្វើ[លក់] បានត្រឹមតែ ១០ទៅ២០ចាន ក្នុងមួយពេលៗ។ នៅពេលហ្នឹង ខ្ញុំចាប់ផ្ដើមគិតថា បើសិនជាយើងធ្វើ ដដែលៗ មិនមានជាការទាក់ទាញចំណាប់ អារម្មណ៍អតិថិជន របស់យើងទេ ព្រោះខ្ញុំគិតថា ភាព ដដែលវាហាក់ដូចជា អត់មានអីអស្ចារ្យ ចឹងទេខ្ញុំនិងភរិយា ពិសេសភរិយាខ្ញុំតែម្ដង ខ្ញុំគិតថា យើងគិត ត្រឡប់ទៅអតីតកាលបន្ថិច បានន័យថា កាលពីអតីតកាល យើងញ៉ាំបាយដាក់ស្លឹកឈូកធ្វើជាចាន ចឹងយើងសាកដាក់មើលសិនហើយចាំមើល អតិថិជនរបស់យើងមានប្រតិកម្មយ៉ាងម៉េច?» ។  

ជាពលរដ្ឋមួយរូប ដែលមានស្រុកកំណើតនៅទីក្រុងព្រះសីហនុ ហើយមករស់នៅ និងបន្ដការសិក្សានៅរាជធានីភ្នំពេញ ក្នុងឆ្នាំ១៩៩៩  លោក បឿន ចំរើន បានឱ្យដឹងបន្ថែមថា នៅពេលលោក និងភរិយា សម្រេចចិត្ដប្រើប្រាស់ស្លឹកឈូកជំនួសឲ្យការប្រើប្រាស់ប្លាស្ទិកក្នុងការវេចខ្ចប់ម្ហូបអាហារ លោកក៏ទទួល បានការគាំទ្រកាន់តែច្រើន។ 

លោក បឿន ចំរើន៖«ចឹងនៅពេលយើងយកស្លឹកឈូកមកក្រាល ហើយយើងចាប់ផ្ដើមមានម្ហូបតែ២ ទៅ៣មុខតែប៉ុណ្ណោះកាលហ្នឹង ដែលពេលនោះ មានដូចជា គោងៀត ត្រីងៀត អីជាដើម។ ក៏ប៉ុន្ដែ វាហាក់មានសន្ទុះការចាប់អារម្មណ៍ខ្លាំងពីអតិថិជនដែលគាត់បានឃើញក្នុងផេករបស់យើង គាត់បាន ឃើញនៅតាមកញ្ចក់ទូរទស្សន៍ ឬក៏វេបសាយផ្សេងៗ ដែលបានចូលរួមចំណែកលើកស្ទួយនូវហាងFrank កាហ្វេរបស់យើង យើងក៏ចាប់ផ្ដើម ពង្រីកនូវទំហំនៃការលក់ ហើយយើងឃើញថា ការលក់ របស់យើងកាន់តែច្រើនឡើង»។

ប្ដូរពីការជំរុញលើកទឹកចិត្ត និងការទទួលបានការគាំទ្រពីអតិថិជន ស្ថាបនិកហាងបាយវត្ត និង Frank Coffee ក្នុងវត្តស្វាយពពែ ហាក់មានសន្ទុះជំរុញចិត្ដបន្ដការប្រើប្រាស់ស្លឹកឈូកវេចខ្ចប់ម្ហូបអាហារ ជូនអតិថិជនដែលតែងតែគាំទ្រដល់ហាងរបស់ខ្លួន។

ទាក់ទិនរឿងនេះដែរ លោក សួង គឹម សេង ពលរដ្ឋមួយរស់នៅរាជធានីភ្នំពេញ បានបង្ហាញការគាំទ្រដល់ការសម្រេចចិត្តរបស់លោក បឿនចំរើន  ដែលបានប្រើប្រាស់ស្លឹកឈូកជំនួសឲ្យការប្រើប្រាស់ប្លាស្ទិក ព្រោះលោកយល់ឃើញថា  នៅពេលដែលអ្នកលក់ទាំងអស់បានជួយកាត់បន្ថយ ការប្រើប្រាស់ប្លាស្ទិក ប្រៀបបានគិតគូរទៅដល់បរិស្ថាន  និងបានចូលរួមចំណែកមួយផ្នែកទៀតគិតគូរទៅដល់សុខភាពអ្នកបរិភោគដូចគ្នា។

គួរបញ្ជាក់ថា នៅក្នុងខែកក្កដា ឆ្នាំ២០២០ លោក បឿន ចំរើន ស្ថាបនិកបាយវត្ត និងម្ចាស់ហាងកាហ្វេ Frank Coffee បានទទួលលិខិតសរសើរទាក់ទងនិងការវេចខ្ចប់ម្ហូបអាហារពីក្រសួងបរិស្ថាន។ ការទទួលស្គាល់ នេះ ក៏ជាចំណែកមួយជំរុញឱ្យលោកបន្ដចូលរួមកាត់បន្ថយការរប្រើប្រាស់ប្លាស្ទិកនៅកម្ពុជា និងការ លក់ដូរមួយដែលគិតគូរទៅដល់សុខភាពអ្នកបរិភោគ។

លោក បឿន ចំរើន៖«ជាការជំរុញលើកទឹកចិត្ដយ៉ាងខ្លាំងបំផុតសម្រាប់យើងខ្ញុំដែលជាស្ថាបនិក យើងខ្ញុំជាមួយបុគ្គលិកទាំងអស់ មានការរីករាយយ៉ាងធំធេងទាក់ទងជាមួយនិងការផ្ដល់តម្លៃពីអតិថិជន ពីទស្សនិកជន ក៏ដូចជា ក្រសួងបរិស្ថានផ្ទាល់ ដែលបានលើកទឹកចិត្ត និងគាំទ្រយើងរហូតមកដល់ ពេលបច្ចុប្បន្ននេះ »។ សូមជម្រាបជូនដែរថា ហាងកាហ្វេ Frank Coffee និងបាយវត្ត មានទីតាំងនៅតាមបណ្ដោយមហាវិថីសុធារស ទល់មុខនឹងស្ថានទូតសហព័ន្ធរុស្ស៊ី ស្ថិតនៅក្នុងពុទ្ធិកសកលវិទ្យាល័យព្រះសីហមុនីរាជា និងវត្តស្វាយពពែនៃរាជធានីភ្នំពេញ៕

អត្ថបទ៖ ជុំ ជោគជាតា  រូបភាព៖ សែត ប៊ុនថាន់