ពលរដ្ឋថៃសម្រុកទៅណា ក្រោយពេលបន្ធូរបន្ថយការរឹតត្បិតបង្ការជំងឺកូវីដ១៩?

នៅថ្ងៃច័ន្ទ១មិថុនាម្សិលមិញ ពលរដ្ឋថៃនាំគ្នាសម្រុកទៅម៉ាស្សា និងទស្សនាខ្សែភាពយន្ត ខណៈដែលប្រទេសតំបន់អាស៊ីអាគ្នេយ៍មួយនេះ បន្ធូរបន្ថយវិធានការបង្ការជំងឺឆ្លងកូវីដ១៩ ទៅលើអាជីវកម្មមួយចំនួនបន្ថែមទៀត ដោយសារករណីឆ្លងជំងឺកូវីដ១៩នៅក្នុងស្រុកមានចំនួនតិច។

បុគ្គលិកនៅហាងម៉ាស្សាមួយកន្លែង ពួកគេពាក់របាំងមុខប្លាស្ទិចនៅពេលម៉ាស្សាអោយអតិថិជន។

Nattida Kittipongpattana ជាអតិថិជនម្នាក់បានរៀបរាប់យ៉ាងដូច្នេះ«ខ្ញុំ រង់ចាំម៉ាស្សាជាយូរមកហើយ ដូច្នេះខ្ញុំក៏មកកាន់ទីនេះ នៅថ្ងៃដំបូង នៅពេលហាងម៉ាស្សាបើកដំណើរការឡើងវិញ»។

ចាប់ពីថ្ងៃច័ន្ទទៅ អាជីវកម្មជាច្រើនមានដូចជា ម៉ាស្សា រោងកុន សួនសត្វ និងស្ប៉ា អាចបើកដំណើរការឡើងវិញបាន ប៉ុន្តែនៅបន្តរក្សាវិធាការរក្សាគម្លាតសង្គមដ៏តឹងរឹង ហើយចំនួនអតិថិជន និងបុគ្គលិកត្រូវមានចំនួនកំណត់ មិនអាចមានច្រើនឡើយ។

ហាងទំនិញទំនើប ដែលបានបើកដំណើរការឡើងវិញ នៅមុននេះ ទទួលបានការអនុញាតិអោយបន្ថែមម៉ោងអាជីវកម្ម របស់ពួកគេបន្ថែមទៀត។

ប្រទេសថៃ នៅថ្ងៃច័ន្ទ១មិថុនាមានករណីឆ្លងជំងឺកូវីដថ្មីប្រចាំថ្ងៃ១ករណីដែលតួលេខអ្នកបានធ្វើអោយប្រទេសថៃ មានជំងឺកូវីដ១៩សរុបនៅទូទាំងប្រទេស កើនឡើងដល់៣០៨២នាក់ និងមានមនុស្សយ៉ាងតិច៥៧នាក់ស្លាប់។