ថ្ងៃច័ន្ទ ទី២៩ ខែមេសា ឆ្នាំ២០២៤
ថ្ងៃច័ន្ទ ទី២៩ ខែមេសា ឆ្នាំ២០២៤
សម្ដេចតេជោ ហ៊ុន សែន នាយករដ្ឋមន្រ្តីនៃកម្ពុជា បានសម្រេចបង្កើតឃុំថ្មីមួយទៀត នៅខេត្តកំពង់ស្ពឺ គឺឃុំយាយម៉ៅពេជ្រនិល និងសង្កាត់ចំនួន ២ទៀត នៅក្រុងប៉ោយប៉ែត ខេត្តបន្ទាយមានជ័យ។ នេះបើតាមអនុក្រឹត្យរបស់សម្ដេចតេជោ។
ផ្អែកតាមអនុក្រឹត្យរបស់សម្ដេចតេជោនាយកមន្រ្តី ឃុំយាយម៉ៅពេជ្រនិល នឹងក្លាយជាដែនដីរដ្ឋបាលឃុំទី១២ចំណុះឱ្យរដ្ឋបាលស្រុកភ្នំស្រួចខេត្តកំពង់ស្ពឺ។ អនុក្រឹត្យបានឱ្យដឹងថាភូមិទាំង៩ដែលត្រូវបានកាត់ពីឃុំត្រែងត្រយឹង មកបង្កើតជារដ្ឋបាលឃុំយាយម៉ៅពេជ្រនិលនេះ រួមមានទី៣ ភូមិទី៦ ភូមិចំការចេក ភូមិទឹកចេញ ភូមិព្រីង ភូមិកងមាស ភូមិវាលធំ ភូមិសម្បទានសែនជ័យ និងភូមិស្រល់។
អនុក្រឹត្យរបស់សម្តេចតេជោ ហ៊ុន សែន បានកំណត់ថា ទីតាំងសាលាឃុំយាយម៉ៅពេជ្រនិល នឹស្ថិតនៅក្នុងភូមិចំការចេក។ យ៉ាងណាក៏ដោយ ថ្វីដ្បិតថាឃុំយាយម៉ៅពេជ្រនិលត្រូវបានបង្កើតឡើង ប៉ុន្តែមិនមានការរៀបចំការបោះឆ្នោតដាច់ដោយឡែកដើម្បីបង្កើតក្រុមប្រឹក្សាឃុំថ្មីនេះទេ។ អនុក្រឹត្យបានតម្រូវឱ្យក្រុមប្រឹក្សាឃុំត្រែងត្រយឹង នៅតែត្រូវបន្តគ្រប់គ្រងភូមិទាំង៩ដដែល រហូតដល់មានក្រុមប្រឹក្សាឃុំយាយម៉ៅពេជ្រនិល មកជំនួស។
ក្នុងអនុក្រឹត្យមួយទៀត សម្ដេចតេជោក៏បានសម្រេចបង្កើតសង្កាត់ចំនួន២បន្ថែមទៀត ក្នុងក្រុងប៉ោយប៉ែត នៃខេត្តបន្ទាយមានជ័យ។ បើតាមអនុក្រឹត្យ សង្កាត់អូរជ្រៅ បានកាត់ភូមិចំនួន៧ភូមិពីសង្កាត់ប៉ោយប៉ែត រួមមាន ភូមិអូរជ្រៅ ភូមិក្បាលកោះ ភូមិក្បាលស្ពាន១ ភូមិក្បាលស្ពាន២ ភូមិសាមគ្គីមានជ័យ ភូមិព្រៃព្រិច និងភូមិប៉ោយប៉ែត ព្រមទាំងកំណត់ទីតាំងសាលាសង្កាត់អូរជ្រៅស្ថិតក្នុងភូមិព្រៃព្រិច។
ចំណែកសង្កាត់អូរឬស្សីវិញ បានកាត់ភូមិចំនួន៥ពីសង្កាត់ផ្សារកណ្តាល រួមមាន ភូមិអូរឬស្សី ភូមិប្រជាធម្មកើត ភូមិទួលពង្រ ភូមិអូរនាង និងភូមិព្រៃគប់ ព្រមទាំងកំណត់ទីតាំងសាលាសង្កាត់អូរឬស្សីត្រូវស្ថិតក្នុងភូមិទួលពង្រ។
ដោយឡែក សម្ដេចប្រមុខរាជរាជរដ្ឋាភិបាលកម្ពុជា ក៏បានចេញអនុក្រឹត្យស្ដីពីការកែសម្រួលព្រំប្រទល់រដ្ឋបាលរវាងឃុំបឹងល្វា ជាមួយឃុំកំពង់ថ្ម និងឃុំប្រាសាទ នៃស្រុកសន្ទុក ខេត្តកំពង់ធំផងដែរ។ សូមបញ្ជាក់ថា រាជរដ្ឋាភិបាលបានកំណត់កាលបរិច្ឆេទរៀបចំការបោះឆ្នោតជ្រើសរើសក្រុមប្រឹក្សឃុំសង្កាត់នៅថ្ងៃទី៥ ខែមិថុនា ឆ្នាំ២០២១ខាងមុខនេះហើយ។
យោងតាមរបាយការណ៍ក្រសួងមហាផ្ទៃ កម្ពុជាមានឃុំចំនួន១៤០៥ និងសង្កាត់ចំនួន២៤១។ ឃុំយាយម៉ៅពេជ្រនិល នឹងក្លាយជាឃុំទី១៤០៦ នៅកម្ពុជា។ តាមទ្រឹស្ដីរដ្ឋបាល ការបំបែក ឬបង្កើតរដ្ឋបាលឃុំសង្កាត់ថ្មីៗ ត្រូវបានផ្អែកលើកត្តា ២ គឺកត្តាប្រជាសាស្រ្ត និងភូមិសាស្រ្ត ក្នុងន័យដើម្បីឱ្យការបំរើសេវាសាធារណៈ ជូនពលរដ្ឋ បានកាន់តែល្អប្រសើរ៕
អត្ថបទ៖ រ៉េន រតនៈ រូបភាព៖ ឯកសារ