ថ្ងៃសៅរ៍ ទី២៧ ខែមេសា ឆ្នាំ២០២៤
ថ្ងៃសៅរ៍ ទី២៧ ខែមេសា ឆ្នាំ២០២៤
ប្រទេសនូវែលហ្សេឡង់សម្រេចចិត្តបិទច្រកព្រំដែន មិនទទួលយកអ្នកធ្វើដំណើរពីប្រទេសឥណ្ឌាជាបណ្ដោះអាសន្ន។ សូម្បីតែពលរដ្ឋនូវែលហ្សេឡង់ក៏ស្ថិតនៅក្នុងបញ្ជីហាមឃាត់ផងដែរ។ ការសម្រេចចិត្តនេះកើតមានឡើងបន្ទាប់ពីនូវែលហ្សេឡង់សង្កេតឃើញថាជំងឺខូវីដ១៩កំពុងតែឆ្លងរាលដាលខ្លាំងមែនទែននៅប្រទេសឥណ្ឌា នាដំណាក់កាលចុងក្រោយ។
ចំណាត់ការរបស់នូវែលហ្សេឡង់កើតមានឡើង បន្ទាប់ពីគេរកឃើញអ្នកឆ្លងជំងឺខូវីដ១៩ចំនួន២៣នាក់។ ក្នុងនោះ គ្រាន់តែអ្នកដំណើរពីប្រទេសឥណ្ឌាមានរហូតដល់១៧នាក់។ ប្រទេសឥណ្ឌារងគ្រោះខ្លាំងដោយសារជំងឺខូវីដ១៩រលកទី២ដែលឆ្លងខ្លាំងជាងលើកទី១។
គម្រោងហាមឃាត់អ្នកធ្វើដំណើរពីឥណ្ឌាទៅនូវែលហ្សេឡង់នឹងចាប់អនុវត្តពីម៉ោង៤រសៀលថ្ងៃទី១១ ខែមេសា រហូតដល់ថ្ងៃ២៨ ខែមេសា។ នៅក្នុងអំឡុងពេលនេះ រដ្ឋាភិបាលនូវែលហ្សេឡង់នឹងពិនិត្យមើលវិធានការរឹតបន្តឹងផ្សេងៗ ដើម្បីពិចារណាលើការដកចេញបម្រាមនេះវិញក្រោយពេលផុតកាលកំណត់។
ប្រទេសនូវែលហ្សេឡង់អាចទប់ទល់នឹងជំងឺខូវីដ១៩បានល្អគ្រាន់បើ ដោយអាចកាត់បន្ថយការឆ្លងនៅក្នុងសហគមន៍ដល់កម្រិតសូន្យនារយៈពេល៤០ថ្ងៃ។ ប៉ុន្តែប្រទេសនេះចាប់ផ្ដើមរឹតបន្តឹងការឆ្លងដែនឡើងវិញ បន្ទាប់ពីមានអ្នកឆ្លងជាបន្តបន្ទាប់។ ជាពិសេស អ្នកធ្វើដំណើរពីប្រទេសឥណ្ឌា។ ថ្ងៃនេះ នូវែលហ្សេឡង់រកឃើញអ្នកឆ្លងនៅក្នុងសហគមន៍ម្នាក់ ដែលជាបុគ្គលិកបម្រើការនៅមណ្ឌលចត្តាឡីស័ក៕
ប្រែសម្រួល៖អនសំអាង