លោកចូបៃដឹន និងព្រះមហាក្សត្រអារ៉ាប៊ីសាអូឌីតសន្ទនាគ្នាតាមទូរស័ព្ទ មុនពេលសហរដ្ឋអាមេរិកបញ្ចេញរបាយការណ៍សម្ងាត់ពាក់ព័ន្ធនឹងការស្លាប់លោកកាសូជី

លោកចូបៃដឹនបានសន្ទនាជាមួយព្រះមហាក្សត្រអារ៉ាប៊ីសាអូឌីតតាមទូរស័ព្ទ, នៅពេលដែលសហរដ្ឋអាមេរិកត្រៀមចេញរបាយការណ៍សម្ងាត់ពាក់ព័ន្ធនឹងការសម្លាប់អ្នកកាសែតឈ្មោះកាសូជី ដែលមាននិន្នាការប្រឆាំងនឹងរដ្ឋាភិបាលអារ៉ាប៊ីសាអូឌីត។ អ្នកវិភាគយល់ថារបាយការណ៍នោះអាចបន្ថែមភាពស្មុគស្មាញ និងធ្វើឲ្យទំនាក់ទំនងប្រទេសទាំង២មានបញ្ហា។

សេតវិមានអះអាងថានៅក្នុងសន្ទនាគ្នានោះ, លោកចូបៃដឹនមិនបាននិយាយពីឈ្មោះលោកកាសូជីទេ លោកគ្រាន់តែគូសបញ្ជាក់ពីតួនាទីសំខាន់របស់សហរដ្ឋអាមេរិកនៅក្នុងការធានាសិទ្ធិមនុស្សជាសាកល និងការគោរពតាមគោលការណ៍នីតិរដ្ឋ។ លោកចូបៃដឹន និងប្រភពដែលស្និទ្ធនឹងរដ្ឋាភិបាលអារ៉ាប៊ីសាអូឌីត សុទ្ធតែនិយាយដូចៗគ្នាថាការសន្ទនាគ្នានោះប្រព្រឹត្តទៅនៅក្នុងបរិយាកាសល្អ។

លោកចូបៃដឹនបានសង្កត់ធ្ងន់ថាលោកពិតជាយកចិត្តទុកដាក់ខ្ពស់ចំពោះបញ្ហាសន្តិសុខជាតិរបស់ប្រទេសអារ៉ាប៊ីសាអូឌីត។ ប៉ុន្តែទន្ទឹមនឹងនោះ លោកលែងគាំទ្រសង្គ្រាមនៅយេមែន, កាត់បន្ថយការលក់អាវុធទៅឲ្យអារ៉ាប៊ីសាអូឌីត និងចុងក្រោយគេចេញរបាយការណ៍សម្ងាត់ស្ដីពីការសម្លាប់លោកកាសូជី។

សំណុំរឿងនេះជាវិញ្ញាសាដ៏រសើប១សម្រាប់ទំនាក់ទំនងរវាងប្រទេសទាំង២ ព្រោះស្រួលមិនស្រួល វាអាចធ្វើឲ្យមើលមុខគ្នាលែងចំ ស្របពេលដែលប្រទេសទាំង២ត្រូវសហការគ្នាដើម្បីទប់ទល់នឹងប្រទេសអ៊ីរ៉ង់។ គេទទួលដំណឹងថារបាយការណ៍សម្ងាត់នោះនិយាយច្បាស់ៗពីការចូលរួមចំណែករបស់ព្រះអង្គម្ចាស់ប៊ីនសាលម៉ាន់ (Bin Salman) នៅក្នុងការសម្លាប់លោកកាសូជី។

នេះជាការរំលោភសិទ្ធិមនុស្សយ៉ាងធ្ងន់ធ្ងរ និងប៉ះពាល់យ៉ាងខ្លាំងចំពោះព្រះកិត្តិនាមរបស់ព្រះអង្គ។ សូមរំឭកថាលោកកាសូជីបានចាញ់ការបោកបញ្ឆោតរបស់មន្ត្រីស្ថានកុងស៊ុលអារ៉ាប៊ីសាអូឌីតប្រចាំប្រទេសតួកគី ដែលរៀបចំផែនការចាប់ខ្លួនគាត់បញ្ជូនទៅប្រទេសអារ៉ាប៊ីសាអូឌីតវិញ។

ប៉ុន្តែគាត់ក្រាញមិនព្រមទៅ ទើបឈានដល់ការសម្លាប់ និងកាត់ជាបំណែកតូចៗ ដើម្បីងាយស្រួលដឹកសាកសពយកចេញទៅក្រៅស្ថានកុងស៊ុលបំបាត់ភស្តុតាង។ កាលនោះ លោកកាសូជីបានស្នើសុំការបញ្ជាក់ពីភាពនៅលីវរបស់លោក ដើម្បីបានរៀបការជាមួយស្ត្រីជនជាតិតួកគី។ ជនដៃដល់នៅក្នុងរឿងនេះជាមនុស្ស១ក្រុមដែលមានទំនាក់ទំនងជាមួយនឹងស្ដេចអារ៉ាប៊ីសាអូឌីត។ អារ៉ាប៊ីសាអូឌីតតែងតែបដិសេធរហូតថាព្រះអង្គម្ចាស់ប៊ីសាលម៉ាន់មិនដឹងរឿងនេះទេ៕

ប្រែសម្រួល៖អនសំអាង