ថ្ងៃសៅរ៍ ទី២៧ ខែមេសា ឆ្នាំ២០២៤
ថ្ងៃសៅរ៍ ទី២៧ ខែមេសា ឆ្នាំ២០២៤
ប្រទេសហ្វីលីពីននៅថ្ងៃអង្គារនេះបានបញ្ជាក់ថា មានករណីវីរុសកូវីដ១៩បំលែងរូបរាងថ្មីដែលបានរកឃើញនៅប្រទេសអង់គ្លេស បានឆ្លងរាលដាលក្នុងសហគមន៍ នៅក្នុងប្រទេសហ្វីលីពីន។ ចំពោះបញ្ហានេះ បានជម្រុញអោយលោកប្រធានាធិបតីហ្វីលីពីន Rodrigo Duterte បានលុបចោលផែនការដែលចង់អនុញាតិ អោយអនីតិជនមួយចំនួនចាកចេញពីលំនៅដ្ឋានពួកគេ។
អាជ្ញាធរហ្វីលីពីនបានអោយដឹងនៅថ្ងៃអង្គារនេះថា«ឥឡូវនេះ យើងមានករណីឆ្លងក្នុងសហគមន៍ដែលករណីជំងឺកូវីដ១៩បំលែងរូបរាងថ្មីរកឃើញនៅអង់គ្លេស បានឆ្លងក្នុងសហគមន៍ ,ឆ្លងនៅក្នុងគ្រួសារ»។
ពិភពលោកកំពុងប្រញ៉ាប់ប្រញ៉ាប់ ទប់ស្កាត់ការឆ្លងរាលដាលជំងឺកូវីដ១៩បំលែងរូបរាងថ្មីរកឃើញនៅអង់គ្លេស ឬអាចសម្គាល់ថា វីរុសជំងឺកូវីដ១៩ B.1.1.7 ដែលមានបំរាមធ្វើដំណើរ ការបិទប្រទេសជាថ្មី និងពង្រឹងវិធានការចត្តាឡីស័ក នៅក្នុងបណ្តាប្រទេសជាច្រើន នៅចំពេលមានកង្វល់ថា វីរុសបំលែងរូបរាងថ្មីមិនត្រឹមតែឆ្លងរាលដាលលឿននោះទេ ប៉ុន្តែថែមទាំងអាចអោយមនុស្សស្លាប់លឿនផងដែរ។
ក្រសួងសុខាភិបាលហ្វីលីពីនអោយដឹងថា វីរុសជំងឺកូវីដ១៩រកឃើញនៅអង់គ្លេស ឬ(B.1.1.7)បានឆ្លងរាលដាលក្នុងចំណោមមនុស្ស១២នាក់ នៅខេត្តBontoc ហើយនៅទូទាំងប្រទេសមានមនុស្ស១៧នាក់ឆ្លងជំងឺកូវីដ១៩ប្រភេទថ្មីនេះ។
សម្រាប់ប្រទេសហ្វីលីពីន ករណីទី១នៃជំងឺកូវីដ១៩រកឃើញនៅអង់គ្លេស បានរកឃើញទៅលើជនជាតិហ្វីលីពីនម្នាក់ដែលធ្វើដំណើរមកពីប្រទេសអេមីរ៉ាត អារ៉ាប់រួម។
ដោយសារមូលហេតុ វីរុសជំងឺកូវីដ១៩រកឃើញនៅអង់គ្លេស ឬ(B.1.1.7)ឆ្លងរាលដាលនៅហ្វីលីពីន លោកប្រធានាធិបតីDuterte បានលុបចោលផែនការដែលអនុញាតិអោយក្មេងអាយុរវាង១០ទៅ១៤ឆ្នាំ ស្ថិតនៅក្នុងតំបន់ហានិភ័យទាប ចេញក្រៅផ្ទះចាប់ពីថ្ងៃទី១កុម្ភៈ។
ប្រទេសហ្វីលីពីន មានអ្នកជំងឺកូវីដ១៩ចំនួន៥១៥,០០០នាក់ និងមានមនុស្សច្រើនជាង១០,២០០នាក់ស្លាប់បាត់បង់ជីវិតដោយសារជំងឺកូវីដ១៩។ ហ្វីលីពីនស្ថិតនៅក្នុងប្រទេសដែលមានករណីឆ្លងជំងឺកូវីដ១៩ធ្ងន់ធ្ងរបំផុតនៅអាស៊ី។