ថ្ងៃព្រហស្បតិ៍ ទី០២ ខែឧសភា ឆ្នាំ២០២៤
ថ្ងៃព្រហស្បតិ៍ ទី០២ ខែឧសភា ឆ្នាំ២០២៤
គណៈកម្មការផ្ដល់ភាពស្របច្បាប់ដល់ពលករកម្ពុជា ដែលកំពុងស្នាក់នៅ និងធ្វើការនៅប្រទេសថៃ បានអំពាវនាវសាជាថ្មី ដល់បងប្អូនពលករកម្ពុជានៅទីនោះ ត្រូវរក្សាភាពនឹងនរ និងបន្តស្នាក់នៅមួយកន្លែងសិន។ ការរក្សាភាពនឹងនរនេះ ជាកិច្ចសហការជាមួយអាជ្ញាធរថៃ ដើម្បីទប់ស្កាត់ការឆ្លងរីករាលដាលជំងឺកូវីត១៩។ បន្ទាប់ពីការផ្ទុះឡើងកូវីត១៩ នៅប្រទេសថៃ ឃើញថា មានបងប្អូនពលករកម្ពុជាមួយចំនួន ព្យាយាមឆ្លងមកកម្ពុជាវិញ ហើយមកដល់ពេលនេះ រកឃើញអ្នកឆ្លងកូវីដ ដែលជាពលករខ្មែរ កើនឡើងដល់ ៥៦នាក់ហើយ។
រាជរដ្ឋាភិបាលកម្ពុជា បានប្រកាសអំពាវនាវដល់ពលករកម្ពុជា ដែលកំពុងស្នាក់នៅ និងធ្វើការនៅប្រទេសថៃ សូមស្នាក់នៅក្នុងប្រទេសថៃបន្តទៀត ចៀសវាងការចល័តពីកន្លែងមួយទៅកន្លែងមួយទៀត ដើម្បីរួមគ្នាបង្ការ ទប់ស្កាត់ ការពារការឆ្លងរីករាលដាលជំងឺកូវីដ-១៩ ដែលកំពុងផ្ទុះឡើងនៅទូទាំងប្រទេសថៃ ។
គណៈកម្មការផ្ដល់ភាពស្របច្បាប់ដល់ពលករកម្ពុជាដែលកំពុងស្នាក់នៅ និងធ្វើការនៅប្រទេសថៃ ក៏បានបញ្ជាកដែរថា ក្នុងពេលមានការរាតត្បាតជំងឺកូវីដ-១៩ នៅប្រទេសថៃនោះ អាជ្ញាធរថៃនឹងមិនមានវិធានការច្បាប់ប្រឆាំងនឹងនិយោជក ក៏ដូចជា ពលករបរទេសដែលកំពុងធ្វើការ និងស្នាក់នៅមួយកន្លែងនោះឡើយ ។ ផ្ទុយទៅវិញ ប្រសិនបើពលករបរទេសដែលចល័តពីកន្លែងមួយទៅកន្លែងមួយទៀត ឬមានបំណងចង់វិលត្រលប់ទៅស្រុកកំណើតវិញនោះ នឹងត្រូវអាជ្ញាធរមានសមត្ថកិច្ចថៃចាប់ឃាត់ខ្លួន ហើយក៏អាចប្រឈមនឹងការឆ្លងជំងឺកូវីដ-១៩ ថែមទៀតដែរ ។
រាជរដ្ឋាភិបាលកម្ពុជា ក៏ដូចជា គណៈកម្មការផ្ដល់ភាពស្របច្បាប់ ដល់ពលករកម្ពុជាដែលកំពុងស្នាក់នៅ និងធ្វើការនៅប្រទេសថៃ អំពាវនាវយ៉ាងទទូចដល់ពលករកម្ពុជាទាំងឡាយ ដែលកំពុងស្នាក់នៅប្រទេសថៃស្រាប់ សូមរក្សាភាពនឹងនរ និងបន្តស្នាក់នៅមួយកន្លែងសិន ដោយកុំទាន់ឆ្លងដែនចូលមកប្រទេសកម្ពុជាវិញឱ្យសោះ ហើយសូមជឿទុកចិត្តលើសមត្ថភាព និងលទ្ធភាពទប់ស្កាត់ ការព្យាបាលជំងឺកូវីដ-១៩ របស់អាជ្ញាធរថៃ។
សូមបញ្ជាក់ថា យោងតាមសេចក្ដីប្រកាសព័ត៌មានរបស់ក្រសួងសុខាភិបាល នៅថ្ងៃនេះមានបានរកឃើញអ្នកធ្វើដំណើរមកពីប្រទេសថៃចំនួន១៥នាក់បន្ថែមទៀត វិជ្ជមានជំងឺកូវីដ-១៩។ រហូតមកដល់ពេលនេះមានពលករមកពីប្រទេសថៃសរុបចំនួន៥៦នាក់ហើយ ត្រូវបានរកឃើញថា បានឆ្លងកូវីដ-១៩ ភាគច្រើនជាស្រ្តី៕
អត្ថបទ៖ សំ ជំនាញ រូបភាព៖ ឯកសារ