ថ្ងៃសៅរ៍ ទី២៧ ខែមេសា ឆ្នាំ២០២៤
ថ្ងៃសៅរ៍ ទី២៧ ខែមេសា ឆ្នាំ២០២៤
មានមនុស្សយ៉ាងតិច១០នាក់ ស្លាប់នៅថ្ងៃច័ន្ទនេះ ហើយមនុស្សជាច្រើននាក់ផ្សេងទៀតត្រូវបានគេគិតថាពួកគេជាប់នៅក្រោមគំនរអាគារបាក់បែក នៅពេលដែលចំណែកខ្លះនៃអាគារពលរដ្ឋរស់នៅមានកំពស់៣ជាន់ត្រូវបាក់រលំ នៅជាយទីក្រុងMumbai ប្រទេសឥណ្ឌា។
ពលរដ្ឋមួយចំនួនព្យាយាមចាកចេញពីអាគារនៅតំបន់ឧស្សាហកម្ម Bhiwandi ចម្ងាយ៤០គីឡូម៉ែត្រភាគខាងឥសាន្តទីក្រុងMumbai បន្ទាប់ពីមានស្នាមប្រេះជាច្រើន ចាប់ផ្តើមកើតឡើងនៅពាក់កណ្តាលយប់។
អាគារពាក់កណ្តាលត្រូវបាក់រលំ ហើយជឿជាក់ថា មានពលរដ្ឋជិត២៥គ្រួសារ ទៅ២៦គ្រួសារ ត្រូវជាប់ក្រោមគំនរអាគារដែលបាក់រលំនោះ។នេះបើតាមការអោយដឹងពីអាជ្ញាធរក្នុងតំបន់។
គេនៅមិនទាន់បានដឹងច្បាស់នៅឡើយទេថាតើ មូលហេតុអ្វីដែលបណ្តាលអោយអាគារអាផាតមិនដែលមាន៥៤យូនិក ក្នុងកំពស់៣ជាន់ ត្រូវបាក់រលំ។
មនុស្សរងរបួសយ៉ាងតិច១១នាក់ ត្រូវបានជួយសង្គ្រោះ។
កងកម្លាំងប៉ូលីស អាជ្ញាធរមូលដ្ឋាន និងកងសង្គ្រោះបន្ទាន់ បានរួមកម្លាំងគ្នាកកាយយកបំបែកកំទេចកំទីចេញដើម្បីសង្គ្រោះជនរងគ្រោះនៅក្រោមគំនរបាក់បែក។
កាលពីខែមុន មានមនុស្សជាច្រើននាក់ស្លាប់ ដោយសារបាក់រលំអាគារនៅតំបន់ឧស្សាហកម្មMahad ចម្ងាយ១៦៥គីឡូម៉ែត្រភាគខាងត្បូងទីក្រុងMumbai។
ប្រែសម្រួលដោយ៖ណាវ័ន្ត