បង្ហាញមុខយ៉ាងកម្រ Fan Bingbing ត្រូវអ្នកគាំទ្រថាស្លៀករ៉ូបដូចភួយ ប៉ុន្តែនៅតែស្អាត

០៧ មិថុនា ២០២១ | កម្សាន្ដ

វត្តមានរបស់ Fan Bingbing (ហ្វាន ពីងពីង) និងតារាល្បីចិនជាច្រើនបានបង្កការចាប់អារម្មណ៍ខ្លាំង ក្នុងកម្មវិធីខួបគម្រប់១០ឆ្នាំរបស់ទស្សនាវដ្ដីមួយកាលពីចុងសប្ដាហ៍កន្លងទៅ។

តារាសម្ដែង Fan Bingbing និងតារាប្រុសស្រីចិនល្បីៗជាច្រើនបានចូលរួមបង្ហាញសម្រស់ ក្នុងកម្មវិធីខួបគម្រប់ ១០ឆ្នាំរបស់ទស្សនាវដ្ដីWonderland នៅទីក្រុងសៀងហៃ កាលពីថ្ងៃទី៥ ខែមិថុនាកន្លងទៅ។ បង្ហាញខ្លួនក្នុងរ៉ូបពណ៌បៃតងវែងអូសដី តារាស្រីវ័យ ៣៩ឆ្នាំត្រូវបានអ្នកគាំទ្រជាច្រើនលាន់មាត់ថា រ៉ូបរបស់នាងមើលទៅដូចភួយ និងមិនស្អាតដូចរាល់ដងឡើយ ប៉ុន្តែទោះយ៉ាងណាសម្រស់របស់នាងនៅតែស្អាតលេចធ្លោដដែល។

នេះជាការបង្ហាញមុខក្នុងព្រឹត្តិការណ៍ធំយ៉ាងកម្ររបស់តួឯកស្រី “មហិច្ឆតាអ៊ូម៉ីនាង” ចាប់តាំងពីផ្ទុះរឿងអាស្រូវគេចវេះមិនបង់ពន្ធមក។ រយៈពេលបីឆ្នាំកន្លងមកហើយបន្ទាប់ពីបញ្ហានេះបានបញ្ចប់ Fan BingBing នៅតែមិនទាន់មានផលិតកម្មណាមួយទាក់ទងឲ្យសម្ដែងភាពយន្តថ្មីនៅឡើយ ហើយភាពយន្តប៉ុន្មានរឿងដែលនាងបានថតរួចក៏នៅតែមិនអាចចាក់ផ្សាយបានដែរ។

ដោយឡែកតារាសម្ដែងប្រុស Huang Xiaoming (ហ័ង សៀវមីង) បានធ្វើឲ្យអ្នកគាំទ្រមានការព្រួយបារម្ភដោយក្នុងកម្មវិធីនេះលោកមើលទៅស្គមខ្លាំង ក្រោយសម្រកទម្ងន់អស់ជាង ១៥គីឡូដើម្បីថតភាពយន្តមួយ។ បើទោះបីការថតបានបញ្ចប់ទៅរាប់ខែហើយក្ដី ប៉ុន្តែទម្ងន់របស់តារាវ័យ ៤៣ឆ្នាំរូបនេះនៅតែមិនទាន់វិលមករកភាពប្រក្រតីនៅឡើយ ៕

ប្រែសម្រួល៖ វ៉ាន់ថន