ព្រះករុណា​ ព្រះ​មហាក្សត្រ​ សម្តេច​ព្រះ​បរម​នាថ​ នរោត្តម​ សីហមុនី​ នឹង​អវត្ត​មាន​ពី​មាតុ​ប្រទេស​ ចាប់​ពី​ថ្ងៃ​ទី២១​ ដល់ថ្ងៃទី២៣ ខែធ្នូ ឆ្នាំ២០១៥​​ ដើម្បី​យាង​បំពេញ ​ព្រះ​រាជ​ទស្សន​កិច្ចផ្លូវរដ្ឋ នៅសាធារណរដ្ឋប្រជាមានិត ឡាវ។

ព្រះរាជសាររបស់ព្រះករុណា ព្រះមហាក្សត្រ ចុះថ្ងៃទី១៩ ខែធ្នូ ឆ្នាំ២០១៥ បង្ហាញថា ព្រះអង្គ នឹងយាងបំពេញ ទស្សនកិច្ចផ្លូវរដ្ឋ រយៈពេល ៣ ថ្ងៃ​ នៅប្រទេសឡាវ ចាប់ពីថ្ងៃទី២១ ខែធ្នូស្អែកនេះ តាមសំណើសូមយាងរបស់លោក Choummaly Sayasone ប្រធានរដ្ឋ នៃសាធារណរដ្ឋ​​ប្រជាធិបតេយ្យ ប្រជាមានិត ឡាវ។

ព្រះករុណា ព្រះមហាក្សត្រ បានបញ្ជាក់ក្នុង ព្រះរាជសារជូនជនរួមជាតិថា នៅក្នុងឱកាសអវត្តមានរបស់ព្រះអង្គ គឺសម្តេចវិបុលសេនាភក្តី សាយ ឈុំ ប្រធានព្រឹទ្ធៃភា នឹងទទួលជួយព្រះអង្គ ក្នុងឋានៈជាប្រមុខរដ្ឋស្តីទី នៃព្រះរាជាណាចក្រកម្ពុជា។

សូមរម្លឹកថា ព្រះករុណា ព្រះមហាក្សត្រ សម្តេចព្រះបរមនាថ នរោត្តម សីហមុនី បានយាងបំពេញ ព្រះរាជទស្សនកិច្ចជាផ្លូវរដ្ឋ នៅប្រទេសវៀត​ណាម រយៈពេល ៣ថ្ងៃ ចាប់ពីថ្ងៃទី២៤ ដល់ថ្ងៃទី២៦ ខែកញ្ញា ឆ្នាំ២០១៥ ដើម្បីរឹតចំណងមិត្តភាព កិច្ចសហប្រតិបត្តិការរវាងកម្ពុជា និង​វៀតណាម ឲ្យកាន់តែរឹងមាំ និងប្រសើរថែមទៀត។

បន្ទាប់ពីយាងបំពេញ ព្រះរាជទស្សនកិច្ចនៅ សាធារណរដ្ឋសង្គមនិយម វៀតណាម ព្រះករុណាសម្តេចព្រះបរមនាថ នរោត្តម សីហមុនី បានយាង​​បំពេញ ព្រះរាជទស្សនកិច្ច ទៅកាន់ក្រុងប៉ារីស សាធារណរដ្ឋបារាំង ដើម្បីចូលរួមសន្និសីទ លើកទី២១ ស្តីពី ការប្រែប្រួលអាកាសធាតុ ​ចាប់ពីថ្ងៃ​​ទី២២ ខែវិច្ឆិកា ដល់ថ្ងៃទី៦ ខែធ្នូ ឆ្នាំ២០១៥៕

អត្ថបទ៖ លីម៉េងហួរ