ធនាគារកណ្តាលថៃ បានទម្លាក់ការព្យាករកំណើនសេដ្ឋកិច្ចសម្រាប់ប្រទេសថៃ ពី ២,៥% ដល់កម្រិត ២% ក្នុងឆ្នាំ ២០២៥ ដោយសារបញ្ហាប្រឈមជាច្រើន និងបញ្ហាពន្ធជាមួយនិងអាមេរិក។ នេះបើយោងតាមការចេញផ្សាយនៅថ្ងៃនេះ ដោយសារព័ត៌មានក្នុងស្រុកថៃ។

ធនាគារកណ្តាលថៃ បានកែប្រែការព្យាករកំណើនរបស់ខ្លួន សម្រាប់សេដ្ឋកិច្ចរបស់ប្រទេសថៃ ដោយព្យាករថា នឹងមានការកើនឡើង ២% នៅឆ្នាំ ២០២៥ ដែលធ្លាក់ចុះពី ២,៥% ធៀបនឹងការព្យាករកាលពីខែកុម្ភៈ។

ធនាគារកណ្តាលថៃ បានបញ្ជាក់ថា ហានិភ័យធ្លាក់ចុះចំពោះកំណើនសេដ្ឋកិច្ចនៅតែមាន ហើយពន្ធគយពាណិជ្ជកម្មរបស់សហរដ្ឋអាមេរិក អាចដាក់សម្ពាធដល់សេដ្ឋកិច្ចថៃ នៅក្នុងឆមាសទី ២ នៃឆ្នាំនេះ ហើយប្រសិនបើសង្គ្រាមពាណិជ្ជកម្មកើនឡើងនោះ កំណើនសេដ្ឋកិច្ចថៃ អាចសម្រេចត្រឹមតែ ១,៣%នៅឆ្នាំនេះ។

ជាមួយគ្នា កំណើននៅឆ្នាំក្រោយ ត្រូវបានគេមើលឃើញថា មាន ១,៨% នៅក្នុងសេណារីយ៉ូរបស់ធនាគារកណ្តាលថៃ និងអាចធ្លាក់ចុះដល់ ១% នៅក្នុងសេណារីយ៉ូដែលអាក្រក់បំផុត។

លើសពីនេះ គោលនយោបាយពាណិជ្ជកម្មរបស់សហរដ្ឋអាមេរិក និងការសងសឹកដែលមានសក្តានុពលពីប្រទេសសេដ្ឋកិច្ចធំៗ នឹងបង្កឱ្យមានការផ្លាស់ប្តូរយ៉ាងសំខាន់ នៅក្នុងទិដ្ឋភាពសេដ្ឋកិច្ច ហិរញ្ញវត្ថុ និងពាណិជ្ជកម្មពិភពលោក។

ធនាគារកណ្តាលថៃ បន្តថា ដំណើរការនេះទើបតែចាប់ផ្តើម និងទទួលរងនូវ ភាពមិនប្រាកដប្រជាខ្ពស់ ដោយសេដ្ឋកិច្ចពិភពលោក ទំនងជានឹងកើនឡើងក្នុងល្បឿនយឺត ហើយស្ថានភាពនេះ ត្រូវបានគេរំពឹងថា នឹងអូសបន្លាយរយៈពេលវែង។

សូមរម្លឹកថា ប្រទេសថៃ ស្ថិតក្នុងចំណោមប្រទេសអាស៊ីអាគ្នេយ៍ដែលរងផលប៉ះពាល់ខ្លាំងបំផុត ដោយវិធានការរបស់ប្រធានាធិបតីអាមេរិក ដូណាល់ ត្រាំ ដែលប្រឈមមុខនឹងពន្ធ ៣៦% ធំជាងការរំពឹងទុក ប្រសិនបើការកាត់បន្ថយ មិនអាចចរចាបានមុនផុតកំណត់នៅក្នុងខែកក្កដា៕
 

អត្ថបទ៖ ងួន សុភ័ត្រ្តា រូបភាព៖ ឯកសារ