បើតាមការចេញផ្សាយរបស់ និយ័តករមូលបត្រកម្ពុជា ឃើញថា ក្រុមហ៊ុន/សហគ្រាស បោះផ្សាយមូលបត្រកម្មសិទ្ធិ និង/ឬ មូលបត្របំណុលលើកដំបូងជាសាធារណៈ ដែលទទួលបានការអនុញ្ញាតពី និយ័តករមូលបត្រកម្ពុជា និងបានចុះបញ្ជីជួញដូរមូលបត្រនៅទីផ្សារមូលបត្រប្រតិស្រុត ក្នុងរយៈពេល ២ឆ្នាំ (មីនា ២០២៥-មីនា ២០២៧) អាចទទួលបានការលើកទឹកចិត្តពន្ធដារ ដោយបន្ថយពន្ធលើប្រាក់ចំណូល និងការអនុគ្រោះបំណុលពន្ធ អនុលោមតាម អនុក្រឹត្យលេខ ៣៩ អនក្រ.បក ចុះថ្ងៃទី១៤ ខែមីនា ឆ្នាំ២០២៥ ស្តីពី ការលើកទឹកចិត្តពន្ធដារក្នុងវិស័យមូលបត្រ។ 

ស្របគ្នានេះ អ្នកវិនិយោគសាធារណៈ ត្រូវទទួលបានការបន្ថយពន្ធកាត់ទុក ៥០% លើការប្រាក់ និង/ឬ ភាគលាភដែលបានមកពីការកាន់កាប់ និង/ឬ ការទិញ-លក់មូលបត្ររដ្ឋ មូលបត្រកម្មសិទ្ធិ និងមូលបត្របំណុល និងត្រូវបានលើកលែងពន្ធលើ ចំណេញមូលធន ចំពោះការទិញ និងការជួញដូរមូលបត្ររដ្ឋ មូលបត្រកម្មសិទ្ធិ និង/ឬ មូលបត្របំណុល សម្រាប់រយៈពេល ២ឆ្នាំ គិតចាប់ពីថ្ងៃ ដែលអនុក្រឹត្យនេះចូលជាធរមាន។ 

មន្រ្តីជំនាញ និងថ្នាក់ដឹកនាំនៃផ្សារមូលបត្រកម្ពុជា សុទ្ធតែមានសុទិដ្ឋិនិយមខ្ពស់ថា នឹងទទួលបានក្រុមហ៊ុនចុះបញ្ជីច្រើនជាង ៦ នៅក្នុងឆ្នាំ ២០២៥ ដើម្បីកៀរគរទុនពី សាធារណជន ដែលជាចំនួនមួយដ៏ច្រើនជាងឆ្នាំមុនៗ។

សូមបញ្ជាក់ថា គិតត្រឹមចុងខែកុម្ភៈនេះ ផ្សារមូលបត្រកម្ពុជាមានក្រុមហ៊ុនចុះបញ្ជី ចំនួន ២៤ ដែលរួមមាន ក្រុមហ៊ុនចំនួន ១១ បានចុះបញ្ជីលក់មូលបត្រកម្មសិទ្ធិ និង ក្រុមហ៊ុនចំនួន ១៣ ទៀតបានចុះបញ្ជីលក់សញ្ញាបណ្ណសាជីវកម្ម ដោយបានកៀរគរទុន ពីផ្សារមូលបត្រកម្ពុជា សរុបប្រមាណ ៤៧៥លានដុល្លារអាម៉េរិក៕

អត្ថបទ៖ ងួន សុភ័ត្រ្តា រូបភាព៖ ឯកសារ